Ish-ndihmësja politike e Hillary Clinton, Huma Abedin, është martuar ditën e djeshme me Alex Soros, djalin e miliarderit George Soros. Çifti organizoi një dasmë luksoze në Hamptons, ku morën pjesë ish-presidentë të SHBA-së dhe figura të njohura të Partisë Demokratike. Nusja 49-vjeçare shkëlqente me një fustan elegant ngjyrë të bardhë, me supe të zbuluara dhe kopsa në pjesën e pasme.
Fustani i personalizuar nga Givenchy kishte të qendisura inicialet e nuses dhe dhëndrit. Ishte qepur nga stilistja Sarah Burton dhe ishte një nga dy fustanet që Abedin veshi për ceremoninë, ndërsa tjetri ishte dizenjuar nga stilisti i njohur Erdem Moralıoğlu.
Në foto, Abedin shihet duke përshëndetur të ftuarit e famshëm, e shoqëruar nga djali i saj. Ajo është divorcuar nga ish-politikani Anthony Weiner, pasi ky i fundit u burgos për dërgimin e mesazheve seksuale një të miture. Thuhet se Weiner, i cili është duke u përpjekur të rikthehet në politikën e Nju Jorkut përmes një kandidimi për këshillin bashkiak, nuk ishte i pranishëm në dasmë.
Rezidenca gjigante e stilit gjeorgjian e familjes Soros, me 12 dhoma gjumi dhe 10 banjo, ishte e rrethuar nga masa të rrepta sigurie. Qen nuhatës dhe agjentë të Shërbimit Sekret ruanin Hillary Clinton dhe ish-presidentin Bill Clinton, të cilët ndodheshin aty. Të ftuar të tjerë ishin edhe Barack dhe Michelle Obama, George dhe Amal Clooney, stilistja Diane von Furstenberg me bashkëshortin e saj Barry Diller, si dhe kryeredaktorja e “Vogue”, Anna Wintour.
Dhjetëra makina luksoze u rreshtuan për të transportuar mysafirët e pasur përmes portës kryesore të pronës. Por jo të gjithë ishin të kënaqur me ngjarjen. Disa banorë vendas u shprehën të irrituar, duke thënë se nuk ishin njoftuar paraprakisht për një event kaq të madh, që solli trafik të rënduar dhe ndërhyrjen e policisë për menaxhimin e rrugëve.
Një grua, e cila preferoi të mbetej anonime, kritikoi familjen Soros si përfaqësuese të “liberalëve të limuzinave” dhe i akuzoi për hipokrizi, duke pretenduar se mbështesin iniciativa anti-policore, ndërsa për dasmën e tyre shfrytëzuan burime të policisë vendore.
Në një moment, një grup studentësh të veshur me kostume festive mbërriti pranë portës kryesore të pronës dhe bëri një selfie përpara saj.
Fotot ekskluzive të “The Mail” e tregojnë Abedinin mahnitëse me një fustan të bardhë me gjatësi mesatare, mëngë të valëzuara dhe sandale me taka të ulëta. Pas dasmës, disa nga të ftuarit u transportuan në hotele luksoze në zonën e Bridgehampton. Atmosfera ishte e qetë dhe festive, me të ftuar që qeshnin dhe bënin shaka me republikanët.
Alex Soros është emëruar trashëgimtar i perandorisë 25 miliardë dollarëshe të babait të tij. Ndërsa Abedin ka qenë një nga bashkëpunëtoret më të ngushta të Hillary Clinton, si gjatë mandatit të saj si Sekretare e Shtetit, ashtu edhe në administratën e parë të Barack Obamës.
Ajo u bë pjesë e mediave pas skandalit me ish-bashkëshortin e saj, kongresmenin Anthony Weiner, i cili u detyrua të japë dorëheqjen pasi u zbulua se u kishte dërguar mesazhe dhe foto nudo grave të reja. Pavarësisht rikandidimit të tij në vitin 2013, dolën sërish në dritë mesazhe me përmbajtje seksuale dhe Weiner përfundoi në burg federal për 21 muaj.
Abedin dhe Soros u njohën në vjeshtën e vitit 2023 gjatë festës së ditëlindjes së Nicky Hilton dhe u fejuan në maj të vitit 2024 në New York City./Tema
