Një nga spektaklet më të rralla të natyrës ndodhi këtë pranverë në Shtetet e Bashkuara, ku miliarda gjinkalla po dalin nga toka pas një periudhe 17-vjeçare. Ky fenomen i jashtëzakonshëm i përket “Brood XIV”, një nga kolonitë më të mëdha të gjinkallave periodike, e cila ka pushtuar pjesë të gjera të SHBA-së Lindore, përfshirë Georgia, Ohio-n jugor, Kentucky, Massachusetts (Cape Cod) dhe Long Island në Nju Jork.
Me ngrohjen e dheut në rreth 18°C , gjinkallat nisin të dalin në sipërfaqe, zakonisht pas një nate me shi pranveror. Ato ngjiten në pemë, bimë dhe madje edhe në njerëz, në kërkim të një vendi të përshtatshëm për të hequr lëkurën e tyre ninfale. Në këtë proces, ato duken të brishta, me trup të zbehtë të verdhë dhe sy të mëdhenj të kuq, që shkëlqejnë si gurë të çmuar.
Pasi trupat e tyre forcohen, gjinkallat fluturojnë drejt majave të pemëve, ku meshkujt nisin një koncert me zëra të fuqishëm për të tërhequr partneret. Kjo simfoni e zhurmshme, një lloj “ulërime dashurie”, shpesh lë dëgjuesit me veshët që u buçasin.
Përveç spektaklit të tyre të jashtëzakonshëm, gjinkallat kanë një rol të rëndësishëm në ekosistem, duke shërbyer si burim i pasur proteine për zogj, kafshë të egra dhe madje edhe për njerëzit në disa kultura. Pas çiftëzimit, femrat vendosin vezët në degët e pemëve dhe më pas vdesin. Nimfat e sapodalura bien në tokë dhe fillojnë ciklin e ri, që do të përsëritet sërish pas 17 vitesh.
Ky fenomen është pjesë e bukurisë magjike të pranverës, kur natyra rizgjohet me ngjyra të gjalla dhe ritme të lashta. Gjinkallat nuk janë vetëm një spektakël për sytë dhe veshët, por edhe një dëshmi mbresëlënëse e forcës dhe përsëritjes së jetës.
