Konkurrentja meksikane Fatima Bosch është shpallur Miss Universe 2025 në finalen e mbajtur në Bangkok, në një prej edicioneve më të përfolura dhe të mbuluara nga skandale në historinë e këtij konkursi. 25-vjeçarja fitoi kurorën pas një sezoni të trazuar, të mbushur me akuza, përplasje, dorëheqje dhe debate mbi drejtësinë e garës.
Bosch u bë qendër e vëmendjes në fillim të muajit, kur një zyrtar tajlandez e kritikoi publikisht për mungesë postimesh promovuese dhe madje kërcënoi me skualifikim të gjithë vajzave që e mbështetën. Në shenjë proteste, Miss Mexico u largua nga salla, e ndjekur nga disa konkurruese të tjera – një moment që bëri xhiron e rrjeteve sociale në mbarë botën.
Ky incident solli reagime të ashpra ndaj organizatorëve, ndërsa Presidentja e Meksikës, Claudia Sheinbaum, e mbështeti publikisht Bosch duke e quajtur “shembull të grave që nuk heshtin përballë agresionit”.
Fitore mes dyshimeve dhe ndarjes së opinionit online
Shpallja e saj fituese shkaktoi reagime të përziera.
Shumë meksikanë festuan triumfin, ndërsa të tjerë ngritën dyshime se organizatorët e kurorëzuan për të “kompensuar” skandalin e mëparshëm.
Komentet online shpërthyen:
“Vitin tjetër, kushdo që largohet nga salla fiton”,
shkruante një përdorues, ndërsa të tjerë thanë se fitorja ishte e merituar dhe e mbështetur nga qëndrimi i saj i fortë.
Dorëheqje, akuza për manipulim dhe drama pas kuintave
Vetëm një javë para finales, dy anëtarë të jurisë dhanë dorëheqjen.
Njëri prej tyre, muzikanti libanezo-francez Omar Harfouch, akuzoi publikisht organizatorët se kishin përzgjedhur paraprakisht finalistet. Organizata Miss Universe i hodhi poshtë akuzat duke i quajtur “plotësisht të pavërteta”.
Një tjetër moment dramatik ndodhi në natën paraprake, kur Miss Jamaica rrëshqiti dhe u rrëzua në skenë, duke u nxjerrë me barelë nga salla. Ajo u shtrua në spital, por pa lëndime serioze.
Përplasja midis drejtuesve tajlandezë dhe meksikanë
Analistët thonë se tensionet e brendshme burojnë nga ndarja e re e drejtimit:
- eventet organizohen në Tajlandë nga Nawat Itsaragrasil, i njohur për format e tij bombastike;
- ndërsa organizata Miss Universe drejtohet nga Meksika, nën menaxhimin e biznesmenit Raul Rocha.
Kjo periudhë tranzicioni ka sjellë konfuzion në procedura dhe komunikim, duke vendosur konkursin në qendër të një debati global.
Miss Universe në krizë: audiencë që bie, kritika që rriten
Prej vitesh, audienca televizive e konkursit ka rënë, ndërsa vëmendja është zhvendosur në TikTok dhe Instagram, ku ish-fitueset grumbullojnë miliona ndjekës.
Pavarësisht kësaj, konkursi mbetet jashtëzakonisht i ndjekur në Amerikën Latine dhe Azinë Juglindore, ku shpesh përfaqëson një mundësi të artë për vajzat që synojnë karrierë në media dhe showbiz.
Megjithatë, kritikat ndaj objektifikimit të grave vazhdojnë, ndërsa organizata ka bërë lëshime, përfshirë lejimin e pjesëmarrjes së grave të martuara, me fëmijë dhe të personave transgjinorë.
Top 5 e Miss Universe 2025
- Miss Mexico – Fatima Bosch (Fituesja)
- Miss Thailand – Praveenar Singh
- Miss Venezuela – Stephany Abasali
- Miss Philippines – Ma Ahtisa Manalo
- Miss Cote d’Ivoire – Olivia Yace
