Ish-kryeministri Sali Berisha publikoi sot një tjetër dëshmi për atë që ai e cilëson si “farsë elektorale” të zgjedhjeve vendore të 11 majit 2025, duke akuzuar qeverinë e Edi Ramës për një sërë veprimesh kriminale që, sipas tij, synuan deformimin e vullnetit të qytetarëve. Në qendër të akuzave ishte edhe praktika e mbledhjes së kartave të identitetit të pensionistëve me bindje djathtas, me qëllim pengimin e tyre për të votuar.
Por ajo që e bën këtë skandal edhe më të rëndë është fakti se zona ku është regjistruar kjo praktikë, sipas burimeve për AIA.AL, i ishte “caktuar” nga Partia Socialiste ministres së Bujqësisë, Anila Denaj – një emër i njohur për dështimet e njëpasnjëshme në drejtimin e sektorit bujqësor.
Një ish-punonjëse e kësaj ministrie, e njohur për redaksinë tonë dhe me një karrierë të gjatë profesionale, ka rrëfyer se në muajin nëntor 2024 iu kërkua të jepte dorëheqjen, me motivacionin absurd se “vendi i saj i punës i duhej ministres Denaj për fushatë”. Redaksia ka në dispozicion edhe regjistrimin e bisedës ku këto fjalë ia deklaron me gojë, pikërisht shefja e burimeve njerëzore në këtë ministri, Elona Gjata me porosi të Denaj.
AIA. AL ka mësuar se në muajt pas këtij zhvillimi, ministria e bujqësisë u mbush me militantë kryesisht nga zona e Petrelës të punësuar nga vetë Denaj, të cilët më pas u angazhuan në mënyrë të drejtpërdrejtë në mbledhjen e të dhënave personale të qytetarëve dhe ushtrimin e presionit elektoral.
“Rrobat e palara të Denajt,” siç u shpreh një burim nga administrata për AIA.AL, “po dalin sot dhe një nga shembujt që e vërteton janë denoncimet publike dhe dëshmi të mbledhura nga opozita.
Në deklaratën e tij të sotme, Berisha denoncoi se janë përdorur metoda të paskrupullta, që nga blerja e votës me para publike, deri tek instrumentalizimi i të gjithë aparatit shtetëror për interesat personale të Ramës dhe bashkëpunëtorëve të tij më të ngushtë. Ja dëshmia e denoncuar nga Berisha:
“Denoncuesi: Kush jeni, si e keni emrin?
Qytetari: Lodovik …
Denoncuesi: Lodovik kush …
Qytetari: Lodovik Rrethi.
Denoncuesi: A doni me votu nesër…
Lodovik Rrethi: Po ishalla…
Denoncuesi: A keni kartë?
Lodovik Rrethi: Jo. E kam kartën por na e ka marrë ai mjeshtri…
Denoncuesi: Si e ka emrin …
Lodovik Rrethi: Besmiri … te posta.
Gentian Ndoj: Kartën tënde kush e ka marrë?
Lodovik Rrethi: Besmiri.
Gentian Ndoj: Besmiri … Pse nuk ta kthen kartën Besmiri…
Lodovik Rrethi: Nuk di gjë, puna e tij. Ai nuk i hedh lekët ai…
Gentian Ndoj: A të duhet karta ty…
Lodovik Rrethi: Më duhet nesër, kismet …
Gentian Ndoj: Pse të duhet karta…
Lodovik Rrethi: Me votu.
Gentian Ndoj: Sa kohë ka që ta ka marrë kartën?
Lodovik Rrethi: Ka 1 javë.
Qytetarja: Marie Rrethi.
Denoncuesi: Sa vjeç je?
Marie Rrethi: 78.
Denoncuesi: Pensionin a e ke marrë
Marie Rrethi: Jo.
Denoncuesi: A don me votu nesër?
Marie Rrethi: Po nesër, për Zotin do të mi bin se s’bën more, s’ka ka ja man. Unë atë ja du.
Denoncuesi: Ç’ka?
Marie Rrethi: Kartat i du në shtëpi.
Denoncuesi: Kush ua ka marrë kartat …
Marie Rrethi: Ky Besi na i ka marrë.
Denoncuesi: Ku punon ai.
Marie Rrethi: Don lek.
Denoncuesi: Çfarë lekësh?
Marie Rrethi: Lekët e pensionit…
Denoncuesi: Tash sa kohë ua ka marrë kartat.
Marie Rrethi: Ka tash 1 javë, tash ni javë po them unë se, kartat janë marrë ma tepër.
Denoncuesi: Pra, ai ua ka marrë kartat dhe nuk ua kthen.
Marie Rrethi: Nuk i kthen, për s’gjallë nuk i kthen.
Denoncuesi: A keni shku me ja kërku kartat?
Marie Rrethi: Ka shku Liku, i kam thënë Likut, çfarë është mor kështu, thotë. Duhet me ja çu Luisit, Luis Lazrit, për me i pru te shpia.
Denoncuesi: E çfarë i ka thënë ai për kartat.
Marie Rrethi: I ka thënë du me ja çu asaj. Mi jep mor mu, i ka thanë kartat. Jo jo i ka thënë, do ja çoj atje, se do i çoj dhe lekët. As ka pru lekë, as ka pru karta.
Denoncuesi: Pra, ju s’keni kartë?
Marie Rrethi: Jo në shtëpi. Jo, jo atje i ka, ai vetë i ka marrë. Hala vaki s’më ka bë kështu.
Gentian Ndoj: Një rast flagrant ka ardhur nga fshati i Barbullushit, ku një denoncues është ankuar pranë Partisë Demokratike, sepse një punonjës poste, i cili shpërndan pensionet në Barbullush, Besmir Lepi u ka marrë kartën e identitetit dhe nuk ua rikthen.
Qytetarët pa kartën e identitetit nuk mund të votojnë, ndaj i bëj thirrje organeve kompetente, Policisë së Shtetit që të marrin masa ndaj këtyre personave sepse po kryejnë krime zgjedhore.”
“Këtu është dëshmia tronditëse se si narkobanditi, punonjësi i shtetit, shkon dhe mbledh kartat e identitetit të qytetarëve… në mënyrë që të mos votojnë,” deklaroi Berisha, duke përshëndetur një çift pensionistësh që kishin denoncuar hapur këtë veprim kriminal.
