Europa po përballet këto ditë me një valë të fuqishme të të nxehtit, e cila ka përfshirë edhe vendin tonë. Temperaturat ekstreme, që në disa vende të Europës kanë kaluar edhe 40 gradë Celsius, po rrezikojnë seriozisht shëndetin e qytetarëve, veçanërisht të grupeve më të ndjeshme.
Në këtë situatë, Ministria e Shëndetësisë ka dalë me një apel të fortë për të gjithë qytetarët, duke kërkuar kujdes maksimal për shëndetin gjatë ditëve me vapë përvëluese.
📌 Disa nga këshillat kryesore të mjekëve janë:
- Pini sa më shumë ujë gjatë ditës, edhe kur nuk ndjeni etje, për të shmangur dehidratimin.
- Qëndroni në ambiente të freskëta dhe të ajrosura.
- Shmangni ekspozimin në diell gjatë orëve më të nxehta, nga ora 11:00 deri në 16:00.
- Konsumoni ushqime të lehta, të pasura me lëngje, si fruta dhe perime të freskëta.
- Vishni rroba të lehta, pambuku dhe me ngjyra të çelura.
- Përdorni kremra mbrojtës për lëkurën.
⚠️ Kujdes i veçantë duhet treguar për:
- Fëmijët e vegjël
- Të moshuarit
- Personat me sëmundje kronike (të zemrës, tensionit, diabetit etj.)
Ministrja e Shëndetësisë thekson se ekipet shëndetësore janë në gatishmëri të plotë në të gjithë vendin për të dhënë ndihmë në çdo rast emergjence. Ajo u bën thirrje qytetarëve që, nëse ndjejnë probleme shëndetësore, të mos hezitojnë të kërkojnë menjëherë asistencën e mjekëve.
🛑 Apeli i Ministrisë së Shëndetësisë është i qartë: Kujdes maksimal për të shmangur rreziqet nga vala e të nxehtit që po godet jo vetëm Shqipërinë, por edhe mbarë kontinentin europian.
