Sipas CNN, disa qytetarë ukrainas që jetojnë në Shtetet e Bashkuara kanë marrë gabimisht një email nga Departamenti Amerikan i Sigurisë Kombëtare, ku thuhej: “Është koha që të largoheni nga Shtetet e Bashkuara.”
Ky mesazh shqetësues, i dërguar pa ndonjë paralajmërim apo sqarim, ka shkaktuar konfuzion dhe panik mes përfituesve të programit “Uniting for Ukraine”, i cili u mundëson refugjatëve ukrainas të strehohen në SHBA përkohësisht.
Autoritetet amerikane e kanë cilësuar dërgimin e këtij emaili si një “gabim teknik” dhe kanë sqaruar se nuk ka ndonjë ndryshim në statusin e qëndrimit të këtyre personave. Një zëdhënës i Departamentit tha për CNN se janë duke punuar për të korrigjuar keqkuptimin dhe për të siguruar që të prekurit të marrin informacionin e saktë sa më shpejt.
