Tiranë – Kandidati socialist për deputet, Erion Braçe, ka ngritur shqetësimin për zhurmat e ndërtimit në zonën e Tiranës së Re, duke e cilësuar situatën si “terror akustik” për banorët.
Në një reagim publik, Braçe ka denoncuar mungesën e rregullimit të orareve të punës për kantieret e ndërtimit, veçanërisht në zona të banuara si pallatet “Moskate”. Ai ka theksuar se të moshuarit dhe fëmijët kanë nevojë për orë qetësie gjatë ditës, por kjo po bëhet e pamundur për shkak të zhurmave të vazhdueshme.
“Këto leje ndërtimi, në zona kaq të populluara, duhet të kenë edhe orare pune të përcaktuara qartë, për të mbrojtur banorët në orë jetike të ditës e natës nga zhurmat e tmerrshme,” u shpreh Braçe.
Ai i bëri thirrje institucioneve përgjegjëse që të marrin masa për të garantuar qetësinë e banorëve dhe të rregullojnë aktivitetin ndërtimor në qytet.
Çështja e zhurmave nga ndërtimet është një shqetësim i kahershëm për qytetarët e Tiranës, me kërkesa të përsëritura për rregullimin e orareve të punës në kantieret e ndërtimit.
