Në një vizitë që ka ngritur reagime të forta në skenën ndërkombëtare, i dërguari i posaçëm i SHBA për Lindjen e Mesme, Steve Witkoff, ka vizituar sot një qendër të shpërndarjes së ndihmave në Rafah të Gazës, në një përpjekje për të vlerësuar nga afër gjendjen humanitare në territorin e rrethuar. I shoqëruar nga ambasadori amerikan në Izrael, Mike Huckabee, Witkoff qëndroi për më shumë se pesë orë në Gaza, ndërsa presidenti Donald Trump deklaroi këtë javë se në enklavë po ndodh “një urie e vërtetë” – një deklaratë që bie ndesh me pretendimet e kryeministrit izraelit Benjamin Netanyahu.
Qendra e vizituar drejtohet nga Gaza Humanitarian Foundation (GHF) – një strukturë e ngritur me mbështetjen e SHBA-ve, që ka për qëllim të anashkalojë rolin e Kombeve të Bashkuara në shpërndarjen e ndihmave. GHF është vënë në qendër të kritikave nga organizatat ndërkombëtare dhe OKB-ja, e cila ka refuzuar të marrë pjesë në këtë skemë, duke e cilësuar atë si shkelje të parimeve humanitare.
Sipas OKB-së, mbi 1,000 palestinezë janë vrarë nga ushtria izraelite teksa përpiqeshin të siguronin ushqim në zonat pranë qendrave të GHF. Shumë prej tyre kanë humbur jetën ose janë plagosur nga të shtënat ose janë shkelur për vdekje nga turma në përpjekje për të marrë ndihma. GHF i mohon këto shifra, ndërsa vetë Witkoff nuk komentoi drejtpërdrejt mbi këto vrasje.
Ambasadori Huckabee lavdëroi GHF-në, duke pretenduar se Hamas “e urren këtë organizatë sepse ushqimi shkon direkt te populli dhe jo te grupi”. Ai theksoi se mbi 100 milionë vakte janë shpërndarë që nga krijimi i GHF në maj – por organizatat humanitare paralajmërojnë se kjo është e pamjaftueshme për 2.1 milionë banorët e Gazës, që do të thotë pak më shumë se një vakt në ditë për një periudhë prej rreth 47 ditësh.
Ndërkohë, Basem Naim, ish-ministri i Shëndetësisë në Gaza dhe zyrtar i Hamasit, e dënoi vizitën si një “shfaqje mediatike të rrezikshme”, duke thënë:
“Z. Witkoff, Gaza nuk është një fermë kafshësh për të organizuar foto të inskenuara përpara kurtheve të vdekjes që menaxhohen nga kompanitë tuaja amerikane.”
Ndërsa Witkoff dhe Huckabee vizitonin qendrën në Rafah, izraelitët qëlluan mbi civilët pranë pikës së shpërndarjes në Al Tina, duke vrarë të paktën tre persona dhe duke plagosur gjashtë të tjerë, sipas spitalit Nasser në Khan Younis. Ushtria izraelite pretendoi se ka qëlluar vetëm në ajër për paralajmërim dhe nuk kishte dijeni për viktima, por njoftoi një hetim të mëtejshëm.
Ambasada amerikane, nga ana e saj, tha se nuk kishte marrë raportime për viktima apo përplasje gjatë kohës së vizitës.
