Vrasja e 22 vjeçares Ilaria Sula në Itali ka shokuar mbarë opinionin në zonën Çermë e Sipërme ku prindërit e saj kanë jetuar. Banorët e Çermës dhe fqinjët e kanë marrë vesh lajmin e kobshëm nëpërmjet mediave dhe rrjeteve sociale.
Me lot në sy ata shprehen për Report Tv se janë shokuar kur e kanë marrrë vesh, ndërsa nga ana tjetër thonë që autori që kreu krimin të marrë dëmimin e merituar deri në atë me vdekje.
“Atë duhet ta vrasësh, jo ta lësh një të gjallë. E morëm vesh nga televizori dhe telefoni. Është një ngjarje e rëndë të vrasësh tjetrin për dashuri” tha një banor i zonës për Report Tv.
“E morëm vesh me anë të televizorit. E vrau ai miku, e futi në valixhe dhe e hodhi në pyje, kështu e mora vesh. Të marri dënimin që meriton. Jemi shokuar shumë, vajzë 22-vjeçe”, u shpreh tjetër.
“Ç’ është kështu. U tërbua rinia. U tërbuan gratë gjithë ditën në telefon. Është për të ardhur keq. Ai që e vrau të varet në mes të Milanos ose në Romë. Çfarë do bëjmë ne pleqtë e shkretë, kemi fëmijët në kurbet”, tha një banore për Report Tv.
Trupi i Ilaria Sula, studentja me origjinë shqiptare, 22 vjeç, e zhdukur që prej 25 marsit në Romë, në zonën e Furio Camillo, u gjet një ditë më parë brenda një valixheje të mbyllur, e hedhur në një greminë përgjatë rrugës provinciale 45B, në segmentin midis Capranica dhe Guadagnolo.
Ish-i dashuri Mark Antony Samson, 23 vjeç, student në universitetin “La Sapienza”, me familje me origjinë nga Filipinet, por i lindur në Itali, thuhet se e ka vrarë Ilaria Sula ndoshta që të njëjtën natë të zhdukjes së saj. Vrasja ndodhi në shtëpinë e familjes së tij në Via Homs, në lagjen Africano, ndërkohë që prindërit e tij ndodheshin në banesë.
Pasi e vrau, ai e fshehu trupin në një valixhe, e cila ishte shumë e vogël për të mbajtur trupin e saj të tërë, dhe më pas e transportoi 40 km larg, duke hedhur thikën në një kazan plehrash.
Telefonin e viktimës e mbajti për vete, fshiu llogaritë e saj në rrjetet sociale, por iu përgjigj shkurt disa mesazheve. Në fund, pasi u zhduk edhe nga telefoni, e hodhi atë në një pusetë dhe shkoi personalisht në shtëpinë e shoqeve të saj për të shtirur sikur po e kërkonte.
