Dy vjet pas ngjarjes së rëndë që tronditi Kosovën dhe mbarë opinionin publik, zbardhen detaje të reja rrëqethëse nga vrasja makabre e Liridona Ademajt, e kryer më 29 nëntor 2023 para syve të fëmijëve të saj të mitur. Dokumenti i Forenzikës Psikiatrike, i siguruar nga gazetarja e Klan Kosovës, Qëndresa Tërshani, hedh dritë mbi dëshminë e plotë të Granit Plavës, një prej personave të akuzuar në këtë ngjarje të rëndë.
Në bankën e të akuzuarve për vrasjen që tronditi gjithë vendin ndodhen ish-bashkëshorti i saj Naim Murseli, së bashku me Granit Plavën dhe Kushtrim Kokallën. Familja Ademaj vazhdon të kërkojë dënim maksimal – burgim të përjetshëm – për tre të akuzuarit.
Sipas dëshmisë së Plavës, qartazi bëhet e ditur se vrasja nuk ka qenë as spontane, as aksidentale, por një krim i planifikuar me kujdes, me pjesëmarrjen e drejtpërdrejtë të Naim Murselit. Plava tregon se dy ditë para vrasjes, ai ishte takuar me Murselin dhe se natën para krimit kishin pirë bashkë. Ditën e ngjarjes, Naimi e kishte pajisur vetë Plavën me armën dhe municionin: një “allat” me 5 fishekë në shanxher dhe 15 të tjerë rezervë.
Plava dëshmon se e ka ndjekur Naimin në distancë gjatë ditës, në një lëvizje të koordinuar deri në momentin kritik. Ai përshkruan se Naimi kishte dalë me Liridonën dhe fëmijët, dhe se në Graçanicë ishte ulur në një kafene duke pritur udhëzimet e Murselit.
Gjatë dëshmisë ai rrëfen:
“Jemi mri te vendi, ngat shtëpisë së Naimit. Ai u nal me kerr. E kanë çel xhamin pak. Une kom qellu në drejtim të asaj gru’së. Naimi thojke ‘gjuj, gjuj’.”
Plava tregon se pas të shtënave është larguar me shpejtësi, është kthyer në shtëpi dhe ka fjetur, pa e ditur ende se Liridona kishte ndërruar jetë. Vetëm të nesërmen mori vesh se ajo kishte vdekur në vend. Dy ditë më vonë, policia e arrestoi.
Dëshmia e Granit Plavës përshkruan me detaje momentet para dhe pas ekzekutimit, duke konfirmuar versionin se vrasja ishte paramenduar, dhe se Liridona Ademaj u vra nga një plan kriminal i organizuar nga ish-bashkëshorti i saj dhe dy bashkëpunëtorët.
Ngjarja vazhdon të sjellë dhimbje të thellë dhe të mbajë të ndarë opinionin publik, ndërsa familja Ademaj kërkon drejtësi të plotë për një krim që vazhdon të mbetet një nga rastet më të rëndë të viteve të fundit në Kosovë.
