Durrës, 15 qershor 2025 – Një aksident i rëndë ka ndodhur mbrëmjen e sotme në zonën bregdetare të Shkëmbit të Kavajës, ku një turist belg është plagosur rëndë gjatë përdorimit të një mjeti lundrues Jet Ski.
Rreth orës 20:00, shërbimi i Urgjencës në Spitalin Rajonal të Durrësit njoftoi për ardhjen e një të riu në gjendje të rënduar shëndetësore. Shtetasi belg H. K., 21 vjeç, kishte pësuar dëmtime të rënda si pasojë e një aksidenti në det, ku dyshohet se ka humbur kontrollin mbi Jet Ski-n dhe ka rënë në ujë.
Menjëherë pas marrjes së njoftimit, shërbimet e Policisë shkuan në spital për të nisur veprimet hetimore. Sipas informacioneve paraprake, i riu është transportuar me urgjencë nga Durrësi drejt Spitalit të Traumës në Tiranë, ku ndodhet nën kujdes intensiv mjekësor.
Policia ka shoqëruar në Komisariat pronarin e mjetit lundrues, shtetasin S. Xh., për verifikime dhe veprime të mëtejshme procedurale.
Një grup i posaçëm hetimor, nën drejtimin e Prokurorisë, është duke punuar për zbardhjen e plotë të ngjarjes dhe përcaktimin e përgjegjësive ligjore. Autoritetet bëjnë apel për respektimin e rregullave të sigurisë gjatë përdorimit të mjeteve lundruese, sidomos në zonat me prani të lartë turistike.
