Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim çështjen penale nr. 178 të vitit 2022, ku janë të pandehur katër persona të lidhur me një aferë korrupsioni që lidhet me një tentativë vrasjeje të ndodhur në Dibër në janar 2020.
Të pandehurit e çështjes janë:
- Shuip Cami, ish-oficer i Policisë Gjyqësore në Dibër, akuzohet për korrupsion pasiv të funksionarëve të drejtësisë.
- Flamur Kurti, banues në Tiranë dhe me precedent penalë, akuzohet për korrupsion aktiv.
- Fluturim Bajrami, shtetas shqiptar me pasaportë italiane, banues në Reggio Emilia, akuzohet për korrupsion aktiv ndaj personave me funksione publike.
- Aldo Puca, oficer i Policisë Gjyqësore në Prokurorinë e Dibrës, akuzohet për shpërdorim detyre.
Rrjeti i korrupsionit: Nga pagesa në euro, tek ndërprerja e përgjimeve
Sipas SPAK, hetimet zbuluan se rreth procedimit penal nr. 9/2020 për një ngjarje të rëndë – tentativë vrasjeje me thikë nga shtetasi Adrian Shahi ndaj Bukurosh Zagradit – janë kryer veprime të paligjshme me synimin për të lehtësuar pozitën e autorit të dyshuar të krimit.
- Shuip Cami, në cilësinë e hetuesit të parë të çështjes, i ka kërkuar dhe marrë 3,000 euro Flamur Kurtit (i njohur i autorit), me premtimin se do ndikonte për të zbutur pozitën procedurale të Adrian Shahit.
- Fluturim Bajrami, lidhje krushqie me Shahinin, i ka dhënë 2,000 euro tashmë të ndjerit Qemal Vranezi (specialist i Policisë së Zonës) për të organizuar një pajtim mes autorit të ngjarjes dhe viktimës.
- Aldo Puca, i ngarkuar me ndjekjen e hetimeve dhe përgjimeve ndaj Shahit, ka ndërprerë përgjimet, nuk ka raportuar transkriptet me përmbajtje korruptive dhe ka dështuar të identifikojë personat e përfshirë, duke lejuar që autori të fshihej për më shumë se një vit në arrati. Vetëm pas ankesave publike të viktimës, u referuan disa nga komunikimet, dy vite më vonë.
SPAK: Sjellje e qëllimshme për të favorizuar autorin e ngjarjes
Nga provat e mbledhura, Prokuroria e Posaçme konkludon se të gjithë të pandehurit kanë vepruar në mënyrë të koordinuar dhe me vetëdije për të favorizuar autorin e tentativës për vrasje, duke e ndihmuar të shmangte përballjen me drejtësinë, përmes veprimeve aktive, pagesave nën dorë dhe shpërdorimit të kompetencave zyrtare.
