Një gjykatë në Korenë e Jugut ka shpallur fajtor ish-presidentin Yoon Suk Yeol për organizimin e një kryengritjeje dhe e ka dënuar me burgim të përjetshëm.
65-vjeçari u shpall fajtor për përpjekjen e tij të dështuar në dhjetor 2024 për të vendosur ligjin ushtarak në vend. Urdhri i tij zgjati vetëm gjashtë orë, por tronditi vendin, paralizoi funksionimin e qeverisë dhe ndikoi në humbjen e zgjedhjeve nga partia e tij.
Vendimi ka thelluar ndarjet politike në Korenë e Jugut. Mbështetës të Yoon u mblodhën jashtë gjykatës në Seul për të protestuar kundër dënimit, ndërsa kundërshtarët e tij e cilësuan vendimin si një fitore për demokracinë.
Reagime të forta politike
Kryetari i Asamblesë Kombëtare, Woo Won-shik, i kërkoi ish-presidentit të kërkojë falje publike.
“Shpresoj që Yoon të pendohet për gabimet e tij dhe t’u ofrojë një ndjesë të sinqertë qytetarëve,” deklaroi ai.
Ndërkohë, lideri i Partisë Demokratike në pushtet, Jung Chung-rae, kritikoi faktin që gjykata nuk dha dënim me vdekje, siç kishin kërkuar prokurorët.
“Ky vendim minon drejtësinë gjyqësore,” tha ai, duke theksuar se insurrekcioni “tronditi themelet e kombit”.
Një histori e gjatë krizash presidenciale
Yoon nuk është i vetmi ish-president në Korenë e Jugut që përfundon në burg. Historia politike e vendit përfshin disa raste të dorëheqjeve, grushteve të shtetit, burgosjeve dhe faljeve presidenciale.
Edhe ish-kryeministri i tij, Han Duck-soo, u dënua muajin e kaluar me 23 vite burg për rolin e tij në atë që gjykata e quajti “kryengritje nga lart”.
Çfarë ndodh tani?
Yoon tashmë po vuan një tjetër dënim lidhur me vendosjen e ligjit ushtarak dhe përballet me dy procese të tjera gjyqësore.
Vendimi pritet të apelohet, ndërsa vendi mbetet i polarizuar mes atyre që e shohin si mbrojtje të rendit kushtetues dhe atyre që e konsiderojnë si dënim politik.
