Erion Braçe ka shpërthyer me kritika ndaj mënyrës se si po organizohen strukturat e Partia Socialiste në terren, duke ngritur shqetësimin për anashkalimin e deputetëve të zgjedhur nga qytetarët.
Në një reagim publik, ai u shpreh se është e papranueshme që të zhvillohen takime në Njësinë 5 pa praninë e deputetit, duke theksuar se kjo praktikë dëmton marrëdhënien me komunitetin dhe besimin e ndërtuar ndër vite.
“Kjo mania për të shkulur deputetin nga zona është gabim, jo për deputetin, por për njerëzit”, deklaron Braçe, duke shtuar se politika kërkon stabilitet dhe lidhje të forta me qytetarët.
Ai kritikoi gjithashtu atë që e quajti “drejtorokraci”, duke theksuar se zëvendësimi i deputetëve me figura pa mandat politik është i dëmshëm dhe demotivon strukturat e partisë.
Megjithatë, Braçe sqaroi se nuk është kundër Ogerta Manastirliu, por synon të ofrojë një alternativë tjetër për Partinë Socialiste dhe për qytetin.
Reagimi i tij vjen në një moment kur brenda PS po shtohen debatet për organizimin dhe përfaqësimin në terren, duke nxjerrë në pah tensione të brendshme në prag të zhvillimeve të reja politike.
