Në një reagim zyrtar ndaj raportimeve mediatike dhe interesit të lartë publik për vendimin e fundit të Gjykatës së Posaçme për Korrupsionin dhe Krimin e Organizuar, avokatët e kryetarit të Bashkisë së Tiranës, Erion Veliaj, dhe bashkëshortes së tij, Ajola Xoxa, kanë bërë të ditur se çifti nuk ka asnjë lidhje me pasurinë e sekuestruar apo me subjektin tregtar “A.K.” shpk.
Sipas deklaratës, pasuria e vetme e paluajtshme në emër të zonjës Xoxa është apartamenti ku çifti banon në zonën e Selitës, një pronë e fituar para martesës dhe që nuk ka qenë në asnjë moment objekt hetimi apo sekuestroje nga autoritetet ligjzbatuese.
Avokatët nënvizojnë se hetimet janë të drejtë ligjore e organit të akuzës, por theksojnë nevojën që çdo dyshim të mbështetet në prova konkrete, në respekt të parimit të prezumimit të pafajësisë. Çifti Veliaj-Xoxa, sipas deklaratës, ka deklaruar pasuritë e tyre në përputhje me ligjin dhe ka bashkëpunuar me institucionet përkatëse.
Deklarata denoncon gjithashtu çdo përpjekje për të lidhur emrin e Veliajt me çështje të pabalancuara ligjërisht si një sulm ndaj figurës së tij publike, duke paralajmëruar ndjekje ligjore për mbrojtjen e reputacionit.
Në fund, avokatët kërkojnë ndjesë për çdo shqetësim të krijuar banorëve të pallatit ku jeton çifti, duke theksuar se i vetmi “faj” i këtyre banorëve është se ndajnë të njëjtin objekt banimi me Veliajn dhe Xoxën.
