Çmimi Nobel për Kimi është ndarë për Susumu Kitagawa, Richard Robson dhe Omar M. Yaghi për kontributin e tyre në zhvillimin e strukturave metal-organike (metal organic frameworks).
Puna e tyre mund të përdoret për të adresuar disa nga problemet më të mëdha të planetit, si kapja e dioksidit të karbonit për të ndihmuar në luftimin e ndryshimeve klimatike, apo reduktimi i ndotjes nga plastika përmes zgjidhjeve kimike.
“Jam thellësisht i nderuar dhe i lumtur, ju faleminderit shumë,” tha profesori Kitagawa përmes telefonit në konferencën për shtyp, pasi mori lajmin.
Njoftimi u bë nga Akademia Mbretërore Suedeze e Shkencave në një konferencë për shtyp në Stokholm, Suedi.
“Sa kohë duhet të qëndroj këtu? Sepse kam një takim,” shtoi profesori Kitagawa me humor.
Tre fituesit do të ndajnë shpërblimin prej 11 milionë koronash suedeze (rreth 872,000 £).
Puna e tyre fokusohet në mënyrën se si molekulat mund të ndërtohen në struktura. Komiteti Nobel e quajti këtë “arkitekturë molekulare”.
Ata zbuluan si të krijojnë struktura me hapësira të mëdha mes molekulave, përmes të cilave mund të kalojnë gazra dhe kimikate të tjera. Këto struktura njihen si “metal organic frameworks”.
Profesori Kitagawa punon në Universitetin e Kiotos në Japoni, profesori Richard Robson në Universitetin e Melburnit në Australi, dhe profesori Omar M. Yaghi në Universitetin e Kalifornisë në SHBA.
Vitin e kaluar, Demis Hassabis, John Jumper dhe David Baker fituan çmimin për punën e tyre mbi proteinat, që janë blloqet ndërtuese të jetës.
Ky është çmimi i tretë shkencor i dhënë këtë javë. Të martën, John Clarke, Michel H. Devoret dhe John M. Martinis fituan Çmimin Nobel për Fizikë për punën e tyre mbi mekanikën kuantike, që hapi rrugën për kompjuterin kuantik.
Të hënën, tre shkencëtarë u vlerësuan me çmimin për Mjekësi për zbulimet mbi mënyrën se si sistemi imunitar sulmon infeksionet e rrezikshme.
Njëri prej fituesve, Dr. Fred Ramsdell, nuk e mori lajmin për 20 orë pasi ndodhej në një udhëtim në natyrë pa sinjal.
