Në qytetin e Lezhës është çelur zyrtarisht Galeria e Përhershme e Pashk Përvathit, galeria e parë private e këtij lloji, e cila sjell para publikut krijimtarinë mbi 40-vjeçare të Mjeshtrit të Madh të pikturës lezhjane dhe shqiptare. Hapja e kësaj galerie i shton qytetit një tjetër hapësirë të rëndësishme kulturore dhe e kthen atë në një destinacion më shumë për artdashësit dhe vizitorët.
Galeria është vendosur në një nga mjediset e banesës së vetë artistit dhe përmbledh vepra që pasqyrojnë njeriun, natyrën dhe peizazhin shqiptar, por edhe motive nga peizazhe të huaja, duke reflektuar universin e gjerë krijues të Pashk Përvathit.
Pas shumë muajsh pune intensive dhe netësh pa gjumë, vetë artisti ka shprehur se hapja e kësaj galerie përfaqëson realizimin e një prej ëndrrave të tij më të mëdha. Përvathi thekson se galeria nuk është thjesht një ekspozitë veprash, por një hapësirë dialogu mes artit dhe publikut.
Hapja e Galerisë së Pashk Përvathit konsiderohet një ngjarje me rëndësi të veçantë kulturore për Lezhën dhe një pasuri e qëndrueshme për artin shqiptar, duke i dhënë publikut mundësinë të njihet më nga afër me gjuhën artistike, filozofinë krijuese dhe rrugëtimin shumëvjeçar të një prej emrave më të rëndësishëm të pikturës shqiptare.
