
Caitlyn Jenner është bërë sërish pjesë e vëmendjes së rrjeteve sociale, pasi një foto e vjetër e saj është rikthyer dhe është bërë virale. Bëhet fjalë për një imazh të vitit 2017, i cili tregonte dyert e tualeteve në “Dodie’s Place Cajun Bar & Grill” në Allen, Texas, të dekoruara me foto të Jenner “para dhe pas tranzicionit”, për të shënuar hyrjet e tualeteve për meshkuj dhe femra.
Në atë kohë, ky veprim shkaktoi reagime dhe kritika të shumta, duke detyruar lokalin të kërkonte falje. Megjithatë, Jenner së fundmi e ka rishpërndarë foton në platformën X, duke e quajtur “jashtëzakonisht qesharake”.
Jenner, e cila bëri tranzicionin publikisht në vitin 2015 në moshën 65-vjeçare, mbetet një figurë shpeshherë përçarëse brenda komunitetit transgjinor, për shkak të qëndrimeve të saj të hapura kundër asaj që e quan “ekstremizëm gjinor”, si dhe kundërshtimit të pjesëmarrjes së grave trans në sportet e femrave.
Pavarësisht kritikave, këtë herë Jenner ka zgjedhur t’i përgjigjet situatës me humor, duke u thënë ndjekësve dhe kundërshtarëve se “nganjëherë thjesht duhet të qeshësh!”