Një ngjarje tragjike ka tronditur qytetin Brampton në Kanada. Savannah Kulla, 29 vjeçe, është identifikuar nga familjarët si gruaja që u qëllua për vdekje të martën pasdite në parkingun e një qendre tregtare në zonën Queen Street East dhe Airport Road.
Sipas familjes, Kulla ishte nënë e katër fëmijëve të vegjël, tre djem dhe një vajze njëvjeçare, e cila u bë pjesë e një Amber Alert pas ngjarjes. Policia raportoi se foshnja u gjet e sigurt pak më vonë, pasi u la në kujdesin e të afërmve në Rajonin e Niagarës.
Autoritetet kanë identifikuar 38-vjeçarin Anthony Deschepper si personin e dyshuar për vrasjen e Kullës. Ai ndërroi jetë pas një përplasjeje me policinë në një stacion karburanti në Niagara Falls, në orët e para të mëngjesit të së mërkurës. Një grua tjetër, që drejtonte automjetin me të cilin lëvizte Deschepper, është nën hetim dhe pritet të përballet me akuza.
Në vendin e ngjarjes janë vendosur lule dhe homazhe, ndërsa policia e Rajonit të Peel e ka cilësuar rastin si një vrasje e lidhur me dhunën në marrëdhënie intime. Savannah Kulla është viktima e dhjetë e vrasjeve të regjistruara këtë vit në këtë rajon.
