ELBASAN – Kryetari i Partisë Demokratike, Sali Berisha, zhvilloi sot një ndalesë në Elbasan, gjatë rrugës për në “Foltoren” e Korçës, ku u takua me strukturat dhe mbështetësit e Partia Demokratike në kuadër të festave të fundvitit.
Gjatë fjalës së tij, Berisha vlerësoi qëndresën e demokratëve përgjatë 12 viteve të fundit, duke theksuar se përpjekjet për të zhdukur opozitën kanë dështuar. Sipas tij, projekti “Shqipëria pa opozitë” u rrëzua falë sakrificës së qytetarëve dhe mbrojtjes së vlerave themelore demokratike, votës së lirë dhe dinjitetit njerëzor.
Kreu i PD akuzoi qeverinë Rama për kapje të institucioneve, korrupsion masiv dhe lidhje me krimin e organizuar, duke deklaruar se opozita ka faktuar brenda dhe jashtë vendit se zgjedhjet në Shqipëri janë farsë dhe nuk pasqyrojnë vullnetin e lirë të qytetarëve. Ai theksoi se opozita nuk do të njohë asnjë pushtet të dalë nga manipulimi i votës.
Berisha paralajmëroi intensifikim të aksionit politik, duke vënë theksin te protestat e vazhdueshme qytetare si mjet demokratik për rrëzimin e autoritarizmit dhe rikthimin e shtetit ligjor. “Qëndresa paqësore është arma jonë më e fortë dhe asgjë nuk i reziston dot vullnetit të qytetarëve,” u shpreh ai.
Në përmbyllje, Berisha deklaroi se Partia Demokratike do të vijojë betejën politike deri në rikthimin e demokracisë në vend, duke theksuar se protestat do të jenë të pandalshme dhe se “projekti për të zhdukur opozitën ka dështuar përfundimisht”.
