Kavajë, 10 Korrik 2025 – Ish-kryeministri Sali Berisha mori pjesë sot në ceremoninë për inaugurimin e shtatores së Josif Budos, të konsideruar si heroi i parë i demokracisë në Shqipëri. Në fjalën e tij përshëndetëse, Berisha u ndal te figura e të riut nga Kavaja, i cili humbi jetën më 10 korrik 1990, gjatë përplasjes me forcat e regjimit komunist.
“Sakrifica sublime e Josif Budos u shndërrua në frymëzim dhe dritë për mbarë shqiptarët”, u shpreh Berisha para qytetarëve të pranishëm në sheshin ku u vendos shtatorja. Ai nderoi gjithashtu familjen e heroit, duke theksuar kontributin dhe qëndresën e qytetit të Kavajës ndaj diktaturës komuniste.
Në ceremoni morën pjesë edhe ambasadori gjerman Werner Daum, kreu i bashkisë Fisnik Qosja, deputetë dhe drejtues të Partisë Demokratike.
Berisha kujtoi ngjarjet e 10 korrikut 1990, kur, pas protestave në ambasadat e huaja në Tiranë, regjimi tentoi të shtypte edhe zërat e lirisë në qytetin e Kavajës. Sipas tij, ishte pikërisht qëndresa e këtij qyteti dhe flijimi i Josif Budos që i dhanë hov lëvizjes për ndryshim në të gjithë vendin.
“Kavaja, qyteti i kryengritjes së parë antikomuniste më 26 mars, qëndroi e pamposhtur. Me dinjitet të lartë përcolli heroin e saj në banesën e pavdekësisë”, deklaroi Berisha.
