TIRANË – Kryetari i Partisë Demokratike, Sali Berisha, ka lëshuar akuza të forta ndaj kryeministrit Edi Rama dhe institucioneve, duke i cilësuar zhvillimet e fundit si prova të një “narko-regjimi” që, sipas tij, mbahet në këmbë përmes presionit, frikës dhe manipulimit të drejtësisë.
Në një deklaratë publike, Berisha krahasoi mënyrën se si janë trajtuar çështje të ndryshme nga institucionet, duke theksuar se ankesa ndaj tij është shqyrtuar për më shumë se shtatë muaj, ndërsa për raste të tjera, sipas tij, vendimet janë marrë “në mënyrë të rrufeshme”. Ai foli edhe për ndryshime të relatorëve dhe presione të ushtruara në procese kyçe.
Berisha hodhi akuza të rënda për një “arkivë kriminale”, duke pretenduar se janë ushtruar survejime ndaj zyrtarëve, ministrave, kundërshtarëve politikë dhe figurave publike, me qëllim shantazhimin e tyre. Sipas tij, këto veprime janë përdorur për të mbajtur nën kontroll shtetin dhe politikën.
Kreu i PD-së deklaroi se Edi Rama është sot, sipas tij, “njeriu më i diskredituar në Europë”, duke e akuzuar se është kthyer në “avokat publik të vjedhjeve të tij” dhe se po përdor institucionet vetëm për të shpëtuar veten. Berisha aludoi gjithashtu për dosje voluminoze dhe të ndara veçmas, duke shtuar se “e vërteta e plotë ende nuk dihet”.
Në këtë kontekst, ai theksoi se largimi i Ramës nga pushteti, sipas tij, nuk mund të ndodhë pa një përfshirje të gjerë qytetare. “Vetëm qytetarët shqiptarë do të japin shtytjen e fundit për të shpëtuar vendin nga ky regjim”, u shpreh Berisha.
Në përfundim, ai bëri thirrje për një angazhim maksimal dhe dialog intensiv me shqiptarët, duke paralajmëruar përgatitjen e protestave që, sipas tij, do të jenë “më të fuqishmet që ka njohur ndonjëherë vendi”.
