Ish-kryeministri Sali Berisha ka reaguar ashpër ndaj shembjeve të ndërtesave në Theth, duke i cilësuar si “akte terrori shtetëror” dhe “krim të pashembullt ndaj qytetarëve”. Në një deklaratë publike, Berisha dënon me forcë atë që e konsideron dhunë dhe shkatërrim të qëllimshëm ndaj ekonomive të banorëve të zonës së Thethit dhe kërkon ndërprerjen e menjëhershme të veprimeve të tilla nga qeveria.
“Terrori shtetëror, dhuna dhe shkatërrimi i ekonomive të banorëve të Thethit është një nga aktet më të rënda dhe të paprecedenta në historinë e një vendi,” deklaroi Berisha.
Ai akuzon kryeministrin Edi Rama se është sjellë ndaj banorëve të Thethit si një “pushtues i egër”, duke e krahasuar me regjime të kaluara autoritare dhe duke e cilësuar armiqësinë e tij ndaj veriut si të pashembullt.
Sipas Berishës, qeveria ka mashtruar banorët, duke i nxitur të investojnë në prona të trashëguara brez pas brezi, me premtime për legalizim, ndërkohë që në vend të kësaj është ndërmarrë një aksion shkatërrues dhe i pabesë.
“Edi Rama përdori mashtrimin dhe pabesinë më të madhe për të realizuar një projekt mafioz, hakmarrës dhe antishqiptar,” tha Berisha, duke shtuar se nuk ekziston asnjë pëllëmbë tokë e zaptuar në Theth apo në veri në përgjithësi, pasi pronat janë trashëgimi shekullore.
Në deklaratën e tij, Berisha akuzon Ramën për diskriminim rajonal dhe neglizhencë sistematike ndaj investimeve në veri të vendit. Ai përmendi mungesën e zhvillimeve infrastrukturore si në aksin Lezhë-Shkodër apo rrugën Shkodër-Tiranë, duke e cilësuar këtë si një qëndrim armiqësor ndaj Shkodrës dhe veriut.
Në përfundim, Berisha kërkon ndalimin e menjëhershëm të “terrorizmit shtetëror” në Theth dhe dëmshpërblimin e të gjitha banesave të shembura.
