Drejtoria Vendore e Policisë Berat ka dhënë informacion zyrtar lidhur me ngjarjen tragjike të ndodhur një ditë më parë, ku shtetasi R. H. humbi jetën si pasojë e rrëzimit nga kati i tretë i një pallati në ndërtim, ku po punonte.
Pas hetimeve paraprake të kryera nga shërbimet e Komisariatit të Policisë Berat, është shpallur në kërkim administratori i firmës së ndërtimit, shtetasi T. N., 65 vjeç. Po ashtu, ka nisur procedimi penal në gjendje të lirë për teknikun e ndërtimit të kësaj firme, shtetasin S. B., 69 vjeç. Të dy akuzohen për veprën penale “Shkelja e rregullave të mbrojtjes në punë”.
Ndërkohë, nga hetimet e tjera të zhvilluara, Policia ka referuar materialet në Prokurori edhe për një tjetër rast. Është proceduar në gjendje të lirë shtetasi M. H., 30 vjeç, banues në fshatin Levan, i cili dyshohet se për motive pronësie ka dëmtuar banesën e një 55-vjeçari.
Materialet për të dy rastet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Berat për veprime të mëtejshme procedurale.
