Kryeqyteti i Iranit, Teherani, ka përjetuar një nga netët më të rënda të bombardimeve që nga nisja e luftës mes Shteteve të Bashkuara, Izraelit dhe Iranit, me dhjetëra shpërthime që tronditën qytetin me mbi 10 milionë banorë.
Sipas raportimeve ndërkombëtare, avionët luftarakë fluturuan në lartësi shumë të ulët mbi qytet, duke hedhur bomba të rënda në disa zona të ndryshme. Shpërthimet u ndjenë në shumë lagje, ndërsa banorët u strehuan në bodrume dhe vend parkimi.
Një banore 38-vjeçare e Teheranit, e cituar nga mediat, tregoi momentet e frikshme të bombardimeve:
“Dukej sikur dhjetëra avionë luftarakë fluturonin mbi kokat tona për rreth 15 minuta rresht. Pastaj kishte një pauzë të shkurtër dhe fillonin sërish sulmet. Toka, dritaret dhe zemrat tona po dridheshin,” tha ajo.
Sulme edhe në qytete të tjera
Sulmet ajrore nuk janë kufizuar vetëm në kryeqytet. Mediat lokale raportojnë se objektiva janë goditur edhe në Isfahan dhe Karaj, ndërsa sekretari amerikan i Mbrojtjes deklaroi se kjo pritet të jetë dita më intensive e sulmeve brenda Iranit që nga fillimi i konfliktit.
Pamjet nga qyteti tregojnë shpërthime të forta dhe flakë që ndriçojnë qiellin, ndërsa në disa zona u raportuan edhe ndërprerje të energjisë elektrike, të cilat më pas u rikthyen.
Interneti pothuajse i bllokuar
Ndërkohë, autoritetet iraniane kanë vendosur një bllokadë pothuajse totale të internetit, duke kufizuar rëndë rrjedhën e informacionit nga vendi.
Monitoruesit ndërkombëtarë të internetit thonë se kjo është një nga ndërprerjet më të mëdha të internetit në botë, duke lënë në funksion vetëm një rrjet të brendshëm shërbimesh.
Frikë dhe pasiguri mes banorëve
Banorët e Teheranit raportojnë panik dhe pasiguri, ndërsa shumë prej tyre mbajnë dyert e hapura për t’u strehuar shpejt në parkime nëntokësore në rast sulmi.
Në të njëjtën kohë, forcat paramilitare dhe policia kanë ngritur postblloqe në disa zona të qytetit, ndërsa autoritetet kanë paralajmëruar ndëshkime për këdo që publikon video të sulmeve pa leje.
Ekonomia nën presion
Edhe pse lufta vazhdon, një pjesë e dyqaneve dhe tregjeve në Teheran po funksionojnë me orar të kufizuar. Në qytet janë krijuar radhë të gjata në pikat e karburantit, sidomos pasi sulmet izraelite goditën depo të mëdha karburanti.
Irani përballet gjithashtu me inflacion rreth 70%, ndërsa çmimet e ushqimeve janë rritur ndjeshëm, duke rënduar më tej situatën ekonomike në vend./Al-Jazeera
