Kryetari i Grupit Parlamentar të Partisë Socialiste dhe Drejtues Politik i PS për Diasporën, Taulant Balla ka ndarë një mesazh nga Londra pas vizitës në kompaninë BTS, në pronësi të sipërmarrësit shqiptar Agron Gjoka.
Në postimin e tij në rrjetet sociale, Balla thekson se Gjoka është një histori suksesi e vërtetë në Britani:
“Vizitë në kompaninë BTS në pronësi të sipërmarrësit shqiptar Agron Gjoka, i cili mbërriti këtu 17 vite më parë. Ka kaluar të gjitha vështirësitë e emigracionit, por sot kompania e tij ka mbi 350 punonjës, shumica shqiptarë, me prezencë në disa qytete angleze dhe me një xhiro vjetore mbi 62 milionë paundë.”
Sipas Ballës, Agron Gjoka është ndër dhjetëra sipërmarrës të suksesshëm që po kontribuojnë fuqishëm në ekonominë britanike, duke ruajtur njëkohësisht lidhjen me vendlindjen. Ai shton se Gjoka ka shprehur interes të drejtpërdrejtë për nismën qeveritare “Paketa e Maleve”.
“Si shumë bashkëatdhetarë të tjerë në diasporë, Agroni ka shfaqur interes #PaketaeMaleve dhe do të investojë në një njësi agro-turizmi në shtëpinë dhe tokën e të parëve të tij në Ujmishtin e bukur të Kukësit.”
Në vizitat e tij në diasporë, Balla inkurajon investimeve që forcojnë lidhjet midis sipërmarrësve shqiptarë jashtë vendit dhe zonave të tyre të origjinës.
