TIRANË – Kryetari i Grupit Parlamentar të Partisë Socialiste dhe Drejtuesi Politik i PS për Diasporën, Taulant Balla, ka reaguar pas tensioneve dhe kaosit të shkaktuar nga opozita në seancën plenare, duke u ndalur edhe te çështja që lidhet me zv.kryeministren Belinda Balluku dhe qëndrimin e Kuvendit përballë hetimeve të SPAK.
Në deklaratën e tij, Balla theksoi se Shqipëria nuk po përballet me asgjë të re, por me një skenar të përsëritur të opozitës sa herë që nuk arrin të mobilizojë protestë qytetare. Ai kujtoi se pamje të ngjashme janë parë edhe në vitet 2017 dhe 2018, duke i cilësuar aktet e bllokimit dhe dhunimit të institucioneve si të dëmshme për imazhin e vendit.
I pyetur drejtpërdrejt nëse mbështetja për SPAK vlen edhe për raste që prekin figura të mazhorancës, përfshirë Belinda Ballukun, Balla u shpreh qartë se Kuvendi i Shqipërisë ka procedura të përcaktuara qartë nga Kushtetuta dhe ligji. “Kuvendi i Shqipërisë e ka të qartë të gjithë procedurën që do të ndjekë. Pavarësisht klithmave, ulërimave dhe kaosit të qëllimshëm, procedura do të nisë dhe do të zbatohet sipas Kushtetutës”, deklaroi ai.
Balla rikonfirmoi mbështetjen e plotë të Partisë Socialiste për SPAK-un dhe luftën kundër kriminalitetit, duke theksuar se pastrimi i policisë dhe forcimi i shtetit ligjor kanë qenë dhe mbeten prioritet i mazhorancës. Ai nënvizoi se kjo mbështetje nuk është selektive, por e bazuar në parimin e ligjit dhe institucioneve.
Në fund, Balla theksoi se çdo vendimmarrje për çështje që lidhen me anëtarë të qeverisë apo deputetë do të trajtohet në mënyrë institucionale, duke garantuar transparencë dhe respektim të plotë të procedurave ligjore, ndërsa përpjekjet për ta kthyer Kuvendin në arenë kaosi nuk do të ndalin proceset demokratike dhe integrimin europian të vendit.
