Drejtuesi Politik i Partisë Socialiste për Diasporën, Taulant Balla, vazhdon turneun mes shqiptarëve që do të votojnë më 11 maj për herë të parë në historinë e pluralizmit.
Nga aeroporti i Bergamos, Balla e krahasoi përvojën e shqiptarëve në kufijtë europianë me atë të qytetarëve të BE-së, duke thënë se trajtimi që u bëhet shqiptarëve kur udhëtojnë jashtë vendit do të marrë fund në mandatin e katërt socialist.
“Sa herë zbresim prej 30 e kusur vitesh në një aeroport në Itali, si këtu në Bergamo ku sapo zbrita apo në Gjermani, Greqi apo kudo në Bashkimin Europian, na tregojnë me gisht një korridor ku duhet të shkojmë të futemi në radhë, ndërkohë që europianët kalojnë në korridorin e tyre pa radhë dhe dalin matanë sapo hap e mbyll sytë,” tha Balla.
Ai theksoi se, megjithëse shqiptarët kanë lëvizje të lirë pa viza, ata ende nuk kanë të drejtën e qëndrimit përtej 90 ditëve në vendet e BE-së pa procedura shtesë.
“Prandaj, kur arrijmë këtu në kufijtë e Bashkimit Europian, na fusin në radhë dhe na marrin në pyetje punonjësit e policisë kufitare, të cilët, teksa na e kthejnë mbarë e mbrapsht pasaportën, na pyesin se ku po shkojmë, sa lekë kemi, me kë jemi, kush të ka ftuar, kur do ikësh e kështu pyetje pa fund me radhë,” shtoi ai.
Balla u bëri thirrje qytetarëve shqiptarë të mbështesin Partinë Socialiste në zgjedhjet e 11 majit, duke argumentuar se vetëm kjo forcë politike mund të sigurojë integrimin e Shqipërisë në BE brenda dekadës.
“Ne mund ta mbyllim përfundimisht këtë histori poshtëruese dhe të mos ndahemi nga tufa e bashkudhëtarëve tanë europianë. Të mos hyjmë më në radhë, të mos i japim llogari një polici në aeroport sepse po hyjmë në këtë vend të BE-së apo në tjetrin, sa do rrimë e kështu me radhë. Ne mund t’i sigurojmë çdo shqiptari e shqptareje pasaportën europiane të Shqipërisë 2030. Prandaj, na duhet që më 11 maj t’u japim pasaportën e BE-së të gjithë shqiptarëve. Na duhet jo thjesht një mandat i katërt, por një mandat më i fortë se të tre mandatet e derisotme,” deklaroi ai.
Ai i ftoi shqiptarët që më 11 maj të votojnë Partinë Socialiste dhe Edi Ramën, duke theksuar se askush tjetër nuk mund të realizojë objektivin e pasaportës së BE-së për qytetarët shqiptarë brenda kësaj dekade.
“Prandaj, kush e do pasaportën e BE-së, të votojë Edi Ramën dhe Partinë Socialiste. Sepse askush tjetër nuk i pajis dot shqiptarët me pasaportën e BE-së brenda kësaj dekade. Prandaj, voto PS, Edi Rama, voto numrin 5 në fletën e votimit!”
