Në Firence, ministri i Shtetit për Marrëdhëniet me Parlamentin, njëkohësisht Drejtues Politik i PS-së për Diasporën, së bashku me me Presidentin e Institutit Kombëtar Italian për Mbrojtjen dhe Mbështetjen e Punëtorëve, Giuliano Zignani u takua me përfaqësues italianë dhe shqiptarë të sindikatave të punëtorëve.
Në takim u diskutua mbi rolin dhe kontributin e komunitetit shqiptar në Toskanë, një nga më të mëdhatë dhe më dinamiket në Itali, me një popullsi të vlerësuar midis 50,000 dhe 60,000 personave. Takimi shërbeu gjithashtu si një platformë për të trajtuar sfidat me të cilat përballen emigrantët shqiptarë dhe për të nënvizuar rëndësinë e përmirësimit të shërbimeve që i mbështesin ata.
Gjatë vizitës në zyrat e UIL Toscana dhe ITAL UIL ku pati mundësinë të takohej me punonjës shqiptarë dhe italo-shqiptarë që kontribuojnë në këto organizata të rëndësishme, Balla e cilësoi komunitetin shqiptar në Itali një histori suksesi.
Marrëveshja për pensionet Shqipëri-Itali ishte një nga temat e diskutimit. Ministri Balla u angazhua për të siguruar që zbatimi i saj të jetë sa më efikas, duke shmangur burokracitë dhe duke garantuar përfitimet për të gjithë përfituesit.
“Dua gjithashtu të falënderoj qeverinë italiane, me të cilën bashkëpunojmë çdo ditë, dhe gjithashtu parlamentin italian, pasi shpresoj që deri në Pashkë të përfundojmë marrëveshjen për pensionet, që është një marrëveshje shumë e rëndësishme” tha ministri.
Një temë tjetër e rëndësishme e takimit ishte diskutimi mbi integrimin europian të Shqipërisë dhe roli që luan diaspora shqiptare në këtë proces. Ministri Balla theksoi se emigrantët shqiptarë janë ambasadorë të Shqipërisë në Itali dhe në gjithë Europën, duke dhënë një kontribut të rëndësishëm për ndërtimin e një imazhi pozitiv të vendit. Integrimi europian, sipas tij, është një proces tashmë i pandalshëm dhe në vitin 2030 Shqipëria do të jetë anëtare e familjes europiane.
“Një pikë tjetër që dëshiroj të theksoj në këtë ndërhyrje është marrëdhënia e ngushtë mes Shqipërisë dhe Italisë. Italia mbetet gjithmonë avokati ynë në rrugën drejt integrimit europian.Siç thotë gjithmonë Kryeministri ynë Rama, ne jemi të bindur se Shqipëria do të bëhet anëtare e Bashkimit Europian deri në vitin 2030, do të përfundojmë marrëveshjen e anëtarësimit deri në vitin 2027, dhe nga 2027 deri në 2030 do të jetë periudha e ku parlamentet e vendeve anëtare të BE-së do të duhet të miratojnë marrëveshjen e anëtarësimit.” deklaroi ministri Balla.
Sa i takon zgjedhjeve parlamentare të 11 majit ku kërkohet pjesëmarrja sa më e madhe e diasporës shqiptare Balla tha se angazhimi i komunitetit shqiptar në Itali është tepër i rëndësishëm.
“Është shume e rëndësishme që komuniteti shqiptar që jeton këtu në Firence të marrë pjesë në këtë proces pasi ku ka pjesëmarrje të lartë ka një demokraci të fortë.”
Në fund të takimit u promovuan produktet tradicionale shqiptare dhe toskane, si një shenjë e bashkëpunimit të ngushtë midis dy kulturave dhe dy vendeve.
Presidenti ITAL UIL shprehu kënaqësinë për praninë e ministrit Balla, për të dëshmuar një bashkëpunim dhe një punë që duhet të bëjmë.
“Prandaj, zoti ministër, ne ju rinovojmë sërish gatishmërinë tonë dhe besoj se mund të them se ajo që kanë bërë miqtë e Toskanës sot është demonstrimi i një vullneti jo vetëm të hapur, jo vetëm mikpritës, por edhe të gatshëm për të bërë gjithçka që është e mundur për ta bërë një popull të ndihet si në shtëpinë e tij – dhe në Itali është tashmë si në shtëpinë e tij, madje edhe më shumë” tha Zignani.
Ministri Balla shprehu angazhimin e tij të plotë për të vazhduar forcimin e marrëdhënieve mes Shqipërisë dhe Italisë, si dhe për të garantuar një mbështetje të qëndrueshme për diasporën shqiptare.
