Një tragjedi e rëndë ka ndodhur në Kerzers, në kantonin e Friburgut në Zvicër, ku një autobus me pasagjerë u përfshi nga flakët, duke shkaktuar të paktën 6 viktima dhe 5 të plagosur, tre prej tyre në gjendje kritike.
Sipas policisë lokale, ngjarja ndodhi në orët e pasdites së 10 marsit, kur një autobus i rrjetit postar AutoPostale mori flakë ndërsa kishte pasagjerë në bord.
Katër nga të plagosurit janë pasagjerë të autobusit, ndërsa një tjetër është një mjek që ndërhyri në vendngjarje për të ndihmuar të lënduarit.
Dyshime se zjarri u shkaktua nga një person
Shkaqet e zjarrit nuk janë ende të konfirmuara zyrtarisht, por sipas disa dëshmitarëve okularë, një person dyshohet se i ka vënë zjarrin vetes brenda autobusit, pasi më parë kishte hedhur benzinë mbi trup.
Në një video të publikuar nga mediat zvicerane, një dëshmitar me fytyrë të mbuluar nga tymi dëgjohet duke thënë:
“Një burrë i vuri zjarrin vetes brenda autobusit.”
Megjithatë, policia thekson se këto dëshmi nuk janë konfirmuar ende dhe hetimet janë në vazhdim.
Operacion i madh shpëtimi
Pas incidentit, zona është rrethuar nga policia ndërsa në vendngjarje kanë ndërhyrë:
- shërbimet zjarrfikëse
- ambulancat
- policia kantonale
Një nga të plagosurit është transportuar me helikopterin e emergjencës REGA drejt spitalit.
Autoritetet kanë kërkuar nga qytetarët të mos afrohen në zonë, ndërsa operacioni i shpëtimit dhe hetimet pritet të vazhdojnë gjatë gjithë natës.
