Një studim i realizuar nga Healthy Florida First ka ngritur alarmin për praninë e niveleve të larta të arsenikut në disa nga karamelet më të njohura në treg.
Sipas raportit, nga 48 produkte të testuara, 28 rezultuan me nivele që autorët i përshkruajnë si toksike. Mes ëmbëlsirave të përmendura janë Kit Kat, Snickers, Twix, Original Skittles, Swedish Fish, Sour Patch Kids dhe Tootsie Roll.
Ekspertët theksojnë se arseniku është një metal i rëndë që mund të gjendet në ushqime për shkak të tokës ku rriten përbërësit ose gjatë përpunimit. Sipas Food and Drug Administration (FDA) dhe Centers for Disease Control and Prevention (CDC), ekspozimi afatgjatë ndaj këtij elementi lidhet me rreziqe serioze shëndetësore, përfshirë disa lloje kanceri, probleme të lëkurës, sëmundje të zemrës dhe efekte neurologjike te fetuset.
Megjithatë, National Confectioners Association (NCA) ka kundërshtuar gjetjet e studimit, duke i cilësuar përfundimet si “të gabuara”.
“Çokollatat dhe karamelet janë të sigurta për t’u konsumuar dhe mund të shijohen si ëmbëlsira, ashtu siç kanë qenë për shekuj,” thuhet në reagimin e shoqatës.
Debati mbi sigurinë ushqimore pritet të vijojë, ndërsa ekspertët këshillojnë konsum të moderuar dhe ndjekjen e udhëzimeve të autoriteteve shëndetësore.
