Drejtoria Vendore e Policisë Tiranë njofton finalizimin e operacionit policor të koduar “The Van”, i zhvilluar nga Sektori i Krimeve të Rënda në bashkëpunim me Komisariatin e Policisë Nr. 2.
Gjatë operacionit u zbuluar një bazë ku ishte fshehur një arsenal i dyshuar për trafik armësh. Sekuestrohen 23 armë zjarri (përfshirë 5 me snajper), 1 silenciator, 17 krehra me municion luftarak, pajisje për shpërthime në distancë, paisje për bllokimin e valëve, uniforma të ngjashme me ato të Policisë, celularë dhe sende të tjera të kundërligjshme.
Si rezultat i operacionit, u arrestua 34-vjeçari E. S., banues në Tiranë, ndërsa dy shtetas të tjerë të përfshirë në veprimtari kriminale janë shpallur në kërkim.
View this post on Instagram
Kontrollet gjatë operacionit u zhvilluan në rrugën “Myslym Shyri”, ku u gjetën:
- 12 pistoleta të markave Beretta, Glock, Rex Delta, Ruger-57 dhe Tanfoglio;
- 6 armë zjarri automatike;
- 5 armë me tytë e gjatë me shënjestër optike (si snajper);
- 1 silenciator;
- 17 krehra armësh;
- Pjesë të ndryshme armësh dhe 15.000 fishekë;
- 17 kuti me pranga të ngjashme me ato të Policisë;
- 12 celularë dhe pajisje për shpërthime në distancë;
- Pajisje gjurmuese GPS dhe për bllokimin e valëve;
- Pajisje për numërimin e kartëmonedhave;
- 3 komplete uniformash të ngjashme me ato të Policisë.
Policia njofton se vijon puna për kapjen e dy shtetasve të shpallur në kërkim dhe për identifikimin e personave të tjerë të përfshirë në këtë veprimtari kriminale. Materialet procedurale i janë referuar Prokurorisë për veprat penale “Trafikimi i armëve dhe i municionit” dhe “Mbajtja pa leje dhe prodhimi i armëve, armëve shpërthyese dhe i municionit”.
