Një arratisje që të kujton filmat hollivudianë, por me produksion lokal: më 3 qershor 2025, një i arrestuar në flagrancë për vepër penale ka “shpëtuar” nga Komisariati i Policisë Elbasan pa shumë zhurmë – ose më saktë, falë qetësisë së personelit.
Si rezultat i kësaj “performance” të pakujdesshme, Agjencia e Mbikëqyrjes Policore (Rajoni Elbasan-Korçë) ka pezulluar nga detyra tre efektivë policie, të cilët, sipas hetimeve, nuk kanë marrë masat e duhura për të ruajtur të ndaluarin, duke u bërë pa dashje bashkë-skenaristë në një skemë arratisjeje që mund ta kishte zili edhe një serial thriller.
Të pezulluarit janë:
- Nënkomisar Alfred Feridum Zhupani, 35 vjeç – Specialist për Rendin;
- Inspektor Përparim Xhaferr Ballolli, 54 vjeç – Ndihmës Specialist Informacioni;
- Inspektor Jonuz Rifat Gjika, 60 vjeç – Ndihmës specialist për ruajtjen e dhomave të sigurisë.
Sipas AMP-së, punonjësit në fjalë “me anë të mosveprimit dhe në shkelje të akteve ligjore e nënligjore që normojnë punën në Policinë e Shtetit, nuk kanë marrë masat e nevojshme për sigurimin e të ndaluarit”, duke i dhënë atij, në mënyrë metaforike (dhe pothuajse fizike), çelësat për të dalë nga dera.
Personi që u arratis, shtetasi B.Z., i arrestuar në flagrancë, është zhdukur nga ambientet e komisariatit si në një numër magjik. Dhe ndërsa kërkimi për të vijon, tre efektivët janë momentalisht “të lirë” nga detyra – ndonëse jo me të njëjtin stil si i ndaluari.
Me sa duket, në Elbasan nuk të duhet tunel për t’u arratisur… mjafton pak mosvëmendje dhe një polici që “ka besim” te të ndaluarit.
