Arratisja e Altin Ndocit nga spitali i burgut në Durrës ka tronditur opinionin publik dhe ka hapur një debat të gjerë politik, juridik dhe mediatik, me akuza të forta për shkelje flagrante të protokolleve të sigurisë, neglizhencë institucionale dhe dyshime për bashkëpunim të brendshëm. Juristë, analistë, gazetarë dhe ish-zyrtarë të drejtësisë, në emisione të ndryshme televizive, e kanë cilësuar ngjarjen si të papranueshme për një person me rrezikshmëri të lartë, të akuzuar për vrasje dhe pjesë e grupeve kriminale.
Në “Now”, ish-deputeti Ervin Salianji si një ish i burgosur deklaroi se, nëse do të ishte zbatuar protokolli, arratisja do të ishte praktikisht e pamundur, duke theksuar se një i burgosur i tillë duhet të shoqërohet me disa efektivë, mjete të shumta dhe prani të vazhdueshme policore. Ai ngriti dyshime për organizim, planifikim dhe elementë korruptivë, ndërsa theksoi edhe problematikat serioze brenda Policisë së Burgjeve, si pagat e ulëta dhe mungesa e motivimit.
Në “Real Story” në ABC News, eksperti i kriminalistikës Ervin Karamuço e cilësoi arratisjen si një plan të mirëmenduar, duke deklaruar se Ndoci e dinte saktësisht itinerarin dhe vendin ku e priste makina. Sipas tij, një person me rrezikshmëri kaq të lartë nuk duhej të shoqërohej nga policë të zakonshëm, ndërsa ngriti dyshime të forta për bashkëpunim me punonjës të paraburgimit të Durrësit. Gazetarja Etleva Delia shtoi se Ndoci kishte kryer pesë vizita në tre vite në të njëjtin spital, çka tregon se ambienti ishte studiuar më parë, ndërsa automjeti që e priste rezulton në emër të një personi të skeduar për grabitje dhe drogë.
View this post on Instagram
Në “Studio 24”, gazetarja Klodiana Haxhiaj bëri të ditur se priten fletë-arreste për drejtuesit e burgut të Durrësit, pasi protokolli parashikon që një i burgosur me rrezikshmëri të lartë të shoqërohet nga katër punonjës policie, ndërsa në rastin konkret kanë qenë vetëm dy, njëri prej të cilëve u godit gjatë përleshjes. Ajo theksoi se urdhri i shoqërimit dhe mënyra e zbatimit të tij janë në qendër të hetimeve.
Në emisionin “Repolitix”, juristi Kreshnik Spahiu ngriti pikëpyetje mbi standardet e dyfishta të sigurisë, duke ironizuar faktin se për kryebashkiakun e Tiranës, Erion Veliaj, dikur u angazhuan dhjetëra efektivë për shoqërim në spital, ndërsa për një të akuzuar për vrasje u përdorën masa minimale. Sipas tij, ngjarja nxjerr në pah përgatitjen e dobët fizike dhe profesionale të Policisë së Burgjeve dhe mënyrën problematike të përdorimit të armëve të shërbimit.
Debati vijoi edhe në “Trialog” në RTSH, ku analisti Lorenc Vangjeli e cilësoi arratisjen si shkelje të rëndë të protokolleve, duke theksuar se një i burgosur nuk duhet të lihet asnjë moment i vetëm dhe se forcat duhet të ishin të pozicionuara edhe në hyrjet e godinës. Gazetari Arion Sulo zbuloi se dy të burgosur janë transportuar me të njëjtin mjet dhe se tre efektivë u larguan për të shoqëruar një tjetër të dënuar, duke lënë Ndocin vetëm me dy policë. Analisti Preç Zogaj e quajti ngjarjen “alarmante”, duke deklaruar se lehtësia e arratisjes krijon përshtypjen sikur i është hapur rruga qëllimisht, ndërsa ish-deputeti Asllan Dogjani e cilësoi skenar të mirëorganizuar, duke folur për tolerim të qëllimshëm dhe lidhje të mundshme mes krimit dhe strukturave të sistemit penitenciar.
Në tërësi, trajtimi i arratisjes së Altin Ndocit në media dhe debate televizive ka nxjerrë në pah një konsensus të gjerë: rasti nuk mund të konsiderohet incident i izoluar, por një dështim serioz i hallkave të sigurisë që kërkon hetim të thelluar, përgjegjësi penale dhe rishikim urgjent të protokolleve për shoqërimin e personave me rrezikshmëri të lartë.
