Gazetari Anri Bala ka ngritur dyshime mbi përdorimin e materialeve të manipuluara dhe të nxjerra jashtë kontekstit për të dezinformuar publikun dhe për të krijuar perceptime të rreme mbi figura publike.
Në Ora e Betit tek Ora News, Bala theksoi se i janë dërguar materiale të dyshimta në lidhje me emra të njohur si deputeti i PD, Gazment Bardhi dhe të tjerë, duke përfshirë edhe një transkriptim të një bisede që pretendonte përfshirjen e Bardhit me raste të diskutueshme.
“E njëjta gjë më ka ndodhur edhe për Gazment Bardhin apo për një gazetar dhe analist që unë edhe e njoh. Më ka ardhur me email nga anonim, si këto Nesti Angoni, më ka ardhur i njëjti transkriptim siç i ka shkuar zotit Berisha fjala vjen. E kam email-in sot e kësaj dite mund edhe të ta tregoj këtu, pra e njëjta gjë edhe për bisedën e Gazment Bardhit sikur e kishte marrë dikur Vis Martinajt atë 100 mijë euro etj. Unë e kisha atë dhe nuk e kam botuar kurrë. Nuk e publikova, dhe 10 ditë më pas SPAK-u tha që është e manipuluar. E njëjta gjë edhe me dosjen e Taulant Ballës. Më beso edhe për këtë ka për të dalë që është nxjerrë jashtë konteksti dhe nuk ka lidhje fare me këtë çështje,” tha Bala.
Bala shpjegoi se nuk e ka publikuar kurrë një material të tillë për shkak të mungesës së verifikimit dhe pasi, sipas tij, këto materiale shpesh rezultojnë të falsifikuara.
“Ky është pislliku më i madh që bëhet në media, gazeta, televizione, kjo që u tha tani: që e ka bërë Taulant Balla. Ti e vure nën emrin e Taulant Ballës pa ditur asgjë. S’mund t’i referohemi akuzës publike të Berishës. Punë tjetër se çfarë flasim ne në kafe,” iu drejtua Bala moderatores së emisionit. “Etikisht në media, nuk mund ta themi një gjë të tillë. Nuk mund të bëjmë interpretime të fakteve pse është arrestuar dikush. Ne gabimin që bëjmë me Berishën, Metën, Veliaj është që e nisim gjyqin nga media. Prandaj ka disa shkallë gjykatash, ka prokurori,” tha Bala.
