Pas raportimeve për praninë në rritje të gjarpërinjve në zonat urbane, shqetësimi ka mbërritur edhe në zemër të kryeqytetit – tek Liqeni Artificial i Tiranës. Qytetarë që frekuentojnë përditë zonën për rekreacion kanë njoftuar se kanë parë gjarpërinj të vegjël dhe të mesëm në afërsi të shtigjeve dhe zonave me bimësi të dendur.
Në reagim të menjëhershëm, Agjencia e Parqeve dhe Rekreacionit (APR), në varësi të Bashkisë së Tiranës, ka nisur spërkatjet për largimin e tyre dhe thirr njëherësh qytetarët për vigjilencë.
“U bëjmë thirrje qytetarëve që frekuentojnë Parkun e Madh të tregojnë kujdes të shtuar, sidomos për fëmijët dhe kafshët shtëpiake. Është e rëndësishme të shmanget qëndrimi në zonat me bar të lartë apo bimësi të dendur,” – thuhet në njoftimin e APR-së.
Bashkia sugjeron disa masa për parandalim:
* Qëndroni në shtigjet e përcaktuara për shëtitje.
* Mbani qentë të lidhur me lashë.
* Mos lejoni fëmijët të luajnë në zonat me bar të gjatë.
Ky operacion është pjesë e një praktike periodike që synon reduktimin e kontaktit të qytetarëve me faunën e egër, sidomos gjatë muajve të verës, kur lëvizshmëria e reptilëve rritet për shkak të temperaturave të larta dhe lagështirës.
Ky fenomen ndodh ndërkohë që gjarpërinjtë janë parë kohët e fundit edhe në bregdetin e jugut dhe në zona të tjera të frekuentuara nga turistët. Specialistët e mjedisit e lidhin këtë me ndryshimet klimatike dhe ndërhyrjet urbane që kanë reduktuar habitatet natyrore të tyre, duke i afruar më shumë pranë njerëzve.
🔗 *Në vijim, strukturat përgjegjëse do të monitorojnë vazhdimisht zonën dhe do të vijojnë me ndërhyrje të specializuara sipas nevojës.
