Kryetarja e Kuvendit, Elisa Spiropali ka përjashtuar nga seanca parlamentare deputetin Agron Shehaj pasi ky i fundit refuzoi të lironte foltoren.
Spiropali u shpreh se radhën për të folur e kishte kreu i PD-së, Sali Berisha, duke e quajtur Agron Shehaj “një kopje e keqe e origjinalit”, referuar bllokimit të foltores nga opozita.
“Deputeti Sali Berisha ka fjalën, apo të vijojmë me folësit e tjerë. Askush nuk mund të bllokojë foltoren. Uluni në vend, zhbllokoni foltoren. Ju tërheq vëmendjen, nëse e përsërisni ju jap vërejte. Mos krijoni skena të kota, do ju heq të drejtën e fjalës.
Lësho foltoren se do ju përjashtoj nga seanca. E di që ju si parti e re doni të nxirrni jashtë loje këta të vjetrit po bëjeni me fjalë se po qe për bllokim foltoreje, revolucion ua kalojën ata se kanë më shumë eksperiencë.
Fjalën ia kam dhënë një deputeti, s’mund ta marrësh dot fjalën me dhunë. Për të qënë kopje të këqija të disa të tjerave janë më mirë origjinalët. Më mirë dëgjojmë origjinalët se sa ju”, tha ajo.
Edhe pas përjashtimi nga seanca, deputeti i pavarur refuzoi të largohej nga foltorja dhe kryeparlamentarja ndërpreu seancën për 5 minuta./tema
