Mjeku Adrian Jorgji, i ftuar këtë të shtunë në emisionin “Kjo Javë” në News24, ka reaguar ndaj pretendimeve të qarkulluara se vaksinat anti-Covid mund të shkaktojnë tumore. Sipas tij, këto teza nuk kanë asnjë bazë shkencore dhe nuk mbështeten nga asnjë studim serioz.
I pyetur drejtpërdrejt për mundësinë e lidhjes mes vaksinimit dhe zhvillimit të tumoreve, Jorgji u shpreh qartë:
“Nuk është e vërtetuar shkencërisht. Që të themi këtë duhet të ketë një studim të mirëfilltë. Na mungon pika e referimit me individët e vaksinuar, me situatën e tyre para vaksinimit.”
Sipas mjekut, që një vaksinë të akuzohet si shkaktar i tumoreve, duhet të ekzistojnë prova të forta, të verifikueshme dhe të mbështetura në të dhëna afatgjata.
“Që të arrijmë deri tek tumori, flasim për një organizëm që kompromentohet në nivele madhore. Të bësh fajtor vaksinën, duhet të ketë argumente shkencore,” deklaroi ai.
Në vend të kësaj, Jorgji theksoi se rreziku real për shëndetin publik lidhet me ekspozimin e përditshëm ndaj faktorëve toksikë të mjedisit.
“Ne jetojmë në ambient toksik, nga ajri, uji, pesticidet, hormonet, koncentratet. Për këto duhet të ngrihet alarmi i madh dhe këto mund të shkaktojnë tumoret,” nënvizoi ai.
Mjeku shtoi se këta faktorë janë të dokumentuar gjerësisht në literaturën mjekësore si burime potenciale të sëmundjeve kancerogjene, ndërsa vaksinat mbeten ndër mjetet më të sigurta të mbrojtjes së shëndetit publik.
