“Ne të gjithë ndiejmë zemërim dhe turp”, deklaroi Macron, duke iu referuar pamjeve të shkatërrimeve në rrugët franceze.
Presidenti francez dënoi sulmet ndaj ndërtesave publike, bashkive dhe bizneseve, duke theksuar se asgjë nuk i justifikon trazirat dhe dëmet e shkaktuara.
“Si mund t’ia bëjnë francezët këtë Francës?”, u shpreh ai gjatë fjalimit drejtuar kombit.
Mbi 2 mijë të arrestuar, qindra efektivë të plagosur
Sipas ministrit të Brendshëm francez, Laurent Nuñez, më shumë se 2 mijë persona janë ndaluar në lidhje me trazirat, ndërsa mbi 600 policë, xhandarë dhe zjarrfikës kanë mbetur të plagosur.
Dëmet materiale janë të konsiderueshme, me qindra biznese të prekura nga sulmet dhe grabitjet.
Në protestat e së shtunës morën pjesë rreth 550 mijë persona në të gjithë Francën, prej të cilëve 110 mijë në Paris, sipas shifrave të Ministrisë së Brendshme.
View this post on Instagram
Digjet bashkia historike, shembet kulla 140-vjeçare
Një nga ngjarjet më të rënda është regjistruar në Limoges, ku një zjarr i fuqishëm përfshiu godinën historike të bashkisë.
Flakët shkatërruan pjesë të ndërtesës dhe shkaktuan shembjen e kullës së orës, një strukturë historike mbi 140-vjeçare.
Kryebashkiaku Guillaume Guérin e cilësoi sulmin si të organizuar dhe të paramenduar, duke deklaruar se personat përgjegjës synonin të shkaktonin dëme të mëdha.
Macron: Mos i ngatërroni protestuesit me ata që shkatërrojnë
Presidenti francez bëri një dallim të qartë mes qytetarëve që protestojnë për kërkesat e tyre dhe personave që përfshihen në dhunë.
“Ne nuk duhet t’i ngatërrojmë kurrë demonstruesit me ata që shkatërrojnë, shkaktojnë trazira dhe grabisin”, deklaroi Macron.
Ai pranoi se qindra mijëra francezë kanë dalë në rrugë me kërkesa legjitime, veçanërisht për çmimet e larta të jetesës dhe karburanteve.
Megjithatë, presidenti paralajmëroi se përgjegjësit e shkatërrimeve do të përballen me drejtësinë.
Macron njoftoi gjithashtu se kryeministri Sébastien Lecornu do të drejtojë të hënën një mbledhje krize për të koordinuar mbështetjen ndaj personave dhe bizneseve të prekura.
Nga protestat studentore te revolta kombëtare
Protestat nisën në shtator nga nxënës dhe studentë që kërkonin përmirësimin e kushteve në shkolla, më shumë staf dhe organizim më të mirë të mësimit.
Më pas, demonstratat u zgjeruan me përfshirjen e sindikatave, grupeve të majta dhe lëvizjes së Jelekëve të Verdhë, të cilat ngritën shqetësime për rritjen e çmimeve dhe përkeqësimin e kushteve ekonomike.
Trazirat janë përhapur në Paris, Marsejë, Lion, Bordo, Strasburg dhe qytete të tjera.
Macron bën thirrje për bashkim kombëtar
Në përfundim të fjalimit, presidenti francez kërkoi qetësi, respekt dhe dialog, duke theksuar se debatet politike duhet të zhvillohen në mënyrë paqësore.
Ai iu referua edhe zgjedhjeve presidenciale të prillit të ardhshëm, duke kërkuar që përplasjet politike të mos zhvendosen në rrugë përmes dhunës.
“Duhet të bashkohemi”, ishte mesazhi përmbyllës i Macron.
