Aeroporti Ndërkombëtar i Tiranës ka regjistruar afro 6 milionë pasagjerë vetëm gjatë gjashtë muajve të parë të vitit 2026, duke u renditur, sipas të dhënave të publikuara nga kryeministri Edi Rama, në krye të aeroporteve të rajonit për trafikun e udhëtarëve.
Kreu i qeverisë publikoi shifrat në rrjetet sociale, duke bërë të ditur se numri i pasagjerëve është rritur me 17% krahasuar me të njëjtën periudhë të vitit 2025.
Rritja e trafikut në Rinas vjen paralelisht me shtimin e fluksit të turistëve drejt Shqipërisë dhe zgjerimin e destinacioneve që lidhen drejtpërdrejt me Tiranën.
Shifrat tregojnë gjithashtu rritjen e rolit të aeroportit të kryeqytetit si një pikë e rëndësishme lidhëse në rajon, jo vetëm për udhëtarët që kanë Shqipërinë si destinacion, por edhe për ata që e përdorin Tiranën si pikë tranziti.
Me afro 6 milionë udhëtarë brenda gjashtë muajve, Aeroporti Ndërkombëtar i Tiranës vijon kështu ritmin e fortë të rritjes së trafikut ajror të regjistruar gjatë viteve të fundit.
