Mark Nika, xhaxhai i Aleks Nikës, një prej katër protestuesve të vrarë më 21 janar 2011, është paraqitur sot në ambientet e Prokurorisë së Posaçme (SPAK), ku ka zhvilluar një takim me prokurorin e çështjes, Alfred Shehu.
Burime bëjnë me dije se Mark Nika ka kërkuar informacion mbi ecurinë e hetimeve për dosjen e njohur të 21 Janarit, në një moment kur familjarët e viktimave vijojnë të kërkojnë zbardhjen e plotë të përgjegjësive penale për ngjarjen tragjike.
Çfarë ndodhi më 21 janar 2011?
Më 21 janar 2011, gjatë një proteste të organizuar nga Partia Socialiste, atëherë në opozitë, para Kryeministrisë, u vranë nga Garda e Republikës katër protestues:
Ziver Veizi, Faik Myrtaj, Hekuran Deda dhe Aleks Nika.
Kryeministri i kohës, Sali Berisha, deklaroi se protesta kishte si synim një “grusht shteti”, ndërsa opozita akuzoi qeverinë për vrasjen e qytetarëve të pafajshëm.
Hetimi dhe dënimet
Në hetimin e zhvilluar pas ngjarjes, të pandehur u morën ish-komandanti i Gardës së Republikës, Ndrea Prendi, dhe gardisti Agim Llupo. Gjykata vendosi se vrasjet kishin ndodhur nga pakujdesia, duke dënuar Prendin me 1 vit burg dhe Llupën me 3 vite burg.
Megjithatë, çështja mbetet ende e hapur në aspektin moral dhe juridik për familjarët e viktimave.
Zhvillime të reja pas 12 vitesh
Dymbëdhjetë vite pas ngjarjes, gazetari Artan Hoxha publikoi audiopërgjime të shërbimeve të huaja, ku sipas tij zbardhet ekzistenca e një urdhri për hapjen e zjarrit ndaj protestuesve, një zhvillim që ka rikthyer debatin publik mbi përgjegjësitë reale për 21 Janarin.
Takimi i sotëm në SPAK shihet nga familjarët si një përpjekje tjetër për të mos lejuar mbylljen përfundimtare të dosjes pa u zbardhur e vërteta e plotë.
