Industria amerikane e filmit dhe medias po përballet me një nga lëvizjet më të mëdha të dekadës. Netflix ka rënë dakord të blejë bizneset filmike dhe ato të streaming të Warner Bros Discovery për 72 miliardë dollarë, duke marrë nën kontroll një nga bibliotekat më të pasura dhe më të rëndësishme të historisë së kinemasë moderne. Marrëveshja, e miratuar njëzëri nga bordet drejtuese të të dy kompanive, vjen pas një gare të fortë me Comcast dhe Paramount Skydance.
Në pronësi të Warner Bros janë disa prej “franchise” më të famshme të botës, përfshirë Harry Potter dhe Game of Thrones, si dhe platforma HBO Max. Marrëveshja pritet të riformësojë industrinë globale të argëtimit, pasi përmasat e bashkimit janë të paprecedenta dhe pritet të nxisin shqyrtim të thelluar nga autoritetet e konkurrencës në SHBA.
Ted Sarandos, bashkëdrejtues ekzekutiv i Netflix, deklaroi se kombinimi i arkivit gjigant të Warner Bros me katalogun e Netflix është një mundësi historike për të “përcaktuar shekullin e ardhshëm të tregimit të historive”. Ai e cilësoi ditën e sotme si “ditë të madhe” për të dy kompanitë dhe theksoi se blerja mund të ketë ardhur si surprizë për disa aksionerë, por është një shans unik për të garantuar dominim afatgjatë në tregun global të streaming-ut.
Edhe David Zaslav, CEO i Warner Bros, e quajti marrëveshjen bashkim mes “dy prej kompanive më të mëdha të tregimit në botë”, duke theksuar se kjo lëvizje do t’u sigurojë shikuesve në mbarë botën histori që do të mbeten të paharrueshme për gjeneratat e ardhshme.
Marrëveshja është vlerësuar me një total prej 82.7 miliardë dollarësh kur përfshihet edhe borxhi i kompanisë, ndërsa çmimi i pastër i aksioneve është 72 miliardë. Blerja do të finalizohet pasi Warner Bros të përfundojë ndarjen e biznesit të saj të studios dhe streaming nga rrjetet televizive globale, si CNN dhe platformat sportive, të cilat nuk përfshihen në marrëveshje.
Ekspertët paralajmërojnë se ky bashkim do të krijojë një superfuqi të re në tregun global të argëtimit. Paolo Pescatore, analist i teknologjisë dhe medias, tha se marrëveshja konfirmon ambiciet e Netflix për t’u bërë lider absolut në botën e re të streaming-ut. Por ai shtoi se integrimi i dy kompanive të kësaj përmase do të sjellë sfida të mëdha.
Analistët e industrisë paralajmërojnë se rregullatorët amerikanë pritet të shqyrtojnë nga afër marrëveshjen, për shkak të ndikimit masiv që një kompani e bashkuar do të kishte në treg. Po ashtu, brenda vetë Hollywood-it mund të ketë kundërshtime, pasi një volum i tillë konsolidimi pritet të sjellë ulje të prodhimeve filmike dhe televizive, ndërsa konsumatorët rrezikojnë të përballen me rritje çmimesh.
Sipas Tom Harrington nga Enders Analysis, nëse marrëveshja miratohet, ajo do të “ridorëzojë orientimin e Hollywood-it”, duke ndryshuar mënyrën se si prodhohet dhe shpërndahet përmbajtja, si dhe duke thelluar rolin dominues të Netflix në tregun global.
