Një bombol gazi ka shpërthyer mesditën e sotme në zonën e Rrugës së Kavajës, pranë kompleksit “Delijorgji”, duke plagosur dy persona. Ngjarja ka ndodhur rreth orës 11:20, në një ambient që aktualisht rezulton jofunksional.
View this post on Instagram
Të plagosurit dhe gjendja e tyre shëndetësore
Sipas njoftimit të Policisë së Shtetit, nga shpërthimi janë dëmtuar:
-
Besmir Dyrmishi, rreth 40 vjeç, pronar i ambientit;
-
Klejdi Bajrami, rreth 28 vjeç, punonjësi i tij.
Të dy u transportuan menjëherë në spital, ku po marrin trajtimin e nevojshëm. Burime spitalore thanë për A2 CNN se të plagosurit u dërguan në Djegie-Plastika në QSUNT, ku u konstatuan djegie të shkallës së lehtë dhe gjendje të qëndrueshme shëndetësore, pa rrezik për jetën.
Hetimet vijojnë
Policia konfirmoi se grupi hetimor ndodhet në vendngjarje dhe po punon për të sqaruar rrethanat dhe shkakun e shpërthimit. Deri tani dyshohet se bombola e gazit ka shpërthyer në rrethana të paqarta, teksa ambienti nuk ishte në funksion në momentin e incidentit.
Më shumë detaje priten pas përfundimit të ekspertizës teknike.
