Plot 33 vite më parë, më 3 dhjetor 1992, u dërgua mesazhi i parë me tekst në botë — një SMS që përmbante vetëm dy fjalë, por që do të shënonte fillimin e një epoke të re në komunikim: “Merry Christmas.”
Mesazhi u dërgua nga inxhinieri britanik Neil Papworth, atëherë 22 vjeç, i cili punonte për kompaninë Sema Group. Gjatë një feste të fundvitit të Vodafone në Britani, Papworth e dërgoi urimin nga kompjuteri i tij drejt telefonit celular të Richard Jarvis, drejtor në Vodafone UK. Në atë periudhë, telefonat nuk kishin ende tastierë për të shkruar mesazhe, kështu që SMS-i i parë nuk u shkrua nga një telefon, por u transmetua përmes një sistemi kompjuterik eksperimental.
Ky moment i thjeshtë teknik u kthye në një pikë historike për komunikimin modern. Vetëm disa vite më pas, shërbimi SMS u përhap globalisht, duke ndryshuar mënyrën se si njerëzit shkëmbenin informacione. Në vitet 2000, SMS-et u bënë forma kryesore e komunikimit ndërpersonal në mbarë botën, duke çuar në standardizimin 160-karakters të mesazheve, tarifat e dedikuara të operatorëve dhe më pas në lindjen e shërbimeve të mesazherisë së sotme.
Sipas të dhënave teknologjike, kulmi i përdorimit të SMS-eve u arrit rreth vitit 2012, me mbi 20 miliardë mesazhe të dërguara çdo ditë globalisht. Edhe pse sot komunikimi është zhvendosur drejt aplikacioneve si WhatsApp, iMessage, Telegram dhe Messenger, SMS-i vazhdon të jetë thelbësor për shërbime të verifikimit, sigurisë dhe komunikimit të shpejtë pa internet.
33 vite më pas, historia e SMS-it fillon pikërisht me një urim të thjeshtë festash — një moment që ndryshoi përgjithmonë botën dixhitale.
