Shkenca thotë se të këndosh – veçanërisht në grup – është një nga aktivitetet më të mira që mund të bëni për shëndetin tuaj. Ekspertët shpjegojnë se këndimi ka efekte të jashtëzakonshme në trurin, zemrën, imunitetin, shpirtin dhe madje edhe në tolerancën ndaj dhimbjes. Dhe kur këndohet me të tjerë, përfitimet rriten ndjeshëm.
Sipas Alex Street, studiues në Universitetin e Kembrixhit, këndimi është një akt kognitiv, fizik, emocional dhe shoqëror. Kërkimet tregojnë se edhe të panjohurit mund të krijojnë lidhje të forta vetëm pas një ore këndimi së bashku.
Nga ana fizike, këndimi forcon mushkëritë dhe sistemin respirator, ul tensionin e gjakut dhe stabilizon rrahjet e zemrës. Studimet tregojnë se këndimi rrit imunitetin më shumë se thjesht dëgjimi i muzikës. Ky efekt lidhet me aktivizimin e nervit vagus dhe çlirimin e endorfinave, hormone që rrisin mirëqenien dhe ulin dhimbjen.
Të këndosh aktivizon një rrjet të gjerë neuronesh në të dy anët e trurit, duke përfshirë qendrat e gjuhës, lëvizjes dhe emocioneve. Kjo, e kombinuar me frymëmarrjen e qetë e të kontrolluar, e bën këndimin një lehtësues të fuqishëm të stresit. Antropologët besojnë se njerëzit kanë kënduar para se të flisnin, ndaj reagimi i trurit ndaj këngës është i rrënjosur thellë në evoluimin tonë.
Këndimi në grup ka ndikime edhe më të mëdha psikologjike se këndimi solo. Ai nxit përkatësi, bashkëpunim dhe rregullim emocional. Në shkolla, përdoret për të mbështetur zhvillimin e gjuhës dhe të komunikimit te fëmijët.
Mjekët po e përdorin gjithashtu këndimin si terapi ndihmëse për pacientët me sëmundje të ndryshme, përfshi Parkinson, goditje në tru, kancer dhe dementia. Të këndosh përmirëson artikulimin te pacientët me Parkinson dhe lehtëson frymëmarrjen te personat me çrregullime respiratore. Një studim britanik tregoi se teknikat e frymëmarrjes të përdorura nga këngëtarët profesionistë përmirësuan cilësinë e jetës te pacientët me Long Covid.
Rasti i njohur i Gabrielle Giffords, kongresmenja amerikane që rifitoi të folurin përmes këngëve të fëmijërisë pas një atentati, tregon fuqinë e jashtëzakonshme të muzikës në rehabilitim. Ekspertët po përdorin këndimin për të ndihmuar pacientët me goditje në tru të rindërtojnë lidhjet neuronale.
Këndimi mund të ndihmojë edhe personat që përballen me rënie kognitive, pasi stimulon kujtesën, vëmendjen dhe ritmin. Edhe pse nevojiten studime afatgjata, të dhënat e deritanishme janë premtuese.
Për ekspertët, këndimi është një nga mënyrat më të fuqishme për të lidhur njerëzit dhe për të përmirësuar shëndetin. Por me rritjen e kohës përpara ekraneve dhe uljen e aktiviteteve të përbashkëta, gjithnjë e më pak njerëz po i shijojnë përfitimet e tij. Ndaj ndoshta është koha të këndojmë më shumë – qoftë edhe një këngë të thjeshtë rreth pemës së Krishtlindjes këtë vit.
