Kryetari i Partisë Demokratike, Sali Berisha, ka njoftuar nisjen e turit të ri të foltoreve në rrethe, një lëvizje që ai e konsideron thelbësore për mobilizimin e strukturave dhe qytetarëve. Në një deklaratë të shpërndarë nga PD, Berisha tha:
“Këtë javë fillojmë foltoret jashtë Tiranës dhe do të vazhdojmë në të gjithë vendin.”
Sipas tij, qëllimi është të forcohet komunikimi direkt me qytetarët dhe të diskutohet mbi situatën politike, ekonomike dhe institucionale të vendit. Turit të foltoreve pritet t’i paraprijë një seri denoncimesh dhe qëndrimesh publike të opozitës.
Berisha: “Narkoshteti na ka kthyer 100 vite mbrapa. Po shkojmë drejt asgjësimit kombëtar”
Në një deklaratë tjetër të bërë publikisht, Berisha u ndal te kriza demografike, duke e cilësuar si pasojë të drejtpërdrejtë të qeverisjes aktuale.
“Për shkak të narkoshtetit kemi lindshmërinë që kemi patur 100 vite më parë. Me këtë ritëm po shkojmë drejt asgjësimit tonë kombëtar.”
Ai tha se rreth 45% e popullsisë është larguar nga vendi në 10 vitet e fundit dhe se sipas OKB-së Shqipëria ka lindshmërinë më të ulët në botë.
Berisha e quajti këtë një “spastrim të heshtur demografik”, duke akuzuar qeverinë se po e zhyt vendin në një kolaps të pashembullt historik.
Në të njëjtën deklaratë, ai vlerësoi miratimin nga CDI të rezolutës që dënon Shqipërinë si “narkoshtet”, duke e cilësuar këtë si një fitore të rëndësishme për opozitën.
Dosja “Balluku” — Berisha: “Në Gjykatën Kushtetuese shkoi Rama, sepse është bashkëautor në vjedhjet e mëdha”
Më herët, Berisha komentoi edhe çështjen e pezullimit të Belinda Ballukut, duke akuzuar kryeministrin Edi Rama për ndërhyrje të paprecedentë në drejtësi.
“Për herë të parë në historinë e Europës, një kryeministër padit gjykatën që pezulloi nga detyra zv/kryeministren hajdute.”
Ai shtoi:
“Në Gjykatë Kushtetuese shkoi Edi Rama… sepse ai është bashkëautor në këto vjedhje të mëdha.”
Berisha akuzoi kryeministrin se ka marrë pjesë drejpërdrejt në negociatat për tunelin e Llogarasë, duke favorizuar kompani që, sipas tij, morën 50 milionë euro më shumë se oferta më e lirë.
