Mbyllja e qeverisë në Shtetet e Bashkuara ka filluar të japë efektet e saj edhe jashtë kufijve amerikanë, përfshirë Shqipërinë. Ambasada e SHBA-ve në Tiranë njoftoi sot se, për shkak të mungesës së një marrëveshjeje për miratimin e buxhetit federal, aktivitetet e saj në rrjetet sociale do të kufizohen ndjeshëm.
Në një postim në faqen zyrtare në Facebook, Ambasada sqaroi: Për shkak të vonesës në miratimin e fondeve buxhetore, kjo llogari në Facebook nuk do të përditësohet rregullisht – me përjashtim të informacioneve urgjente për çështjet e sigurisë – derisa të rinisë veprimtaria e rregullt.
Megjithatë, shërbimet konsullore thelbësore do të vazhdojnë të ofrohen sipas mundësive, përfshirë vizat për tranzit dhe udhëtimet në SHBA, si dhe shërbimet e pasaportave: Gjatë kësaj kohe, shërbimet e planifikuara të pasaportave dhe vizave për tranzit në Shtetet e Bashkuara dhe në ambasadat e konsullatat jashtë vendit do të vazhdojnë sipas mundësive.
Ambasada u bën thirrje qytetarëve të kontrollojnë statusin dhe informacionet më të fundit në faqen zyrtare të Departamentit të Shtetit: travel.state.gov.
Çfarë do të thotë kjo për qytetarët shqiptarë? Si rezultat, përditësimet në rrjetet sociale të Ambasadës do të jenë të kufizuara. Shërbimet e planifikuara konsullore (p.sh., aplikime për viza apo pasaporta) do të ofrohen vetëm nëse kushtet e lejojnë. Komunikimet do të kufizohen në raste urgjente të sigurisë.
Ky kufizim i punës së ambasadës vjen pasi qeveria amerikane ka ndaluar funksionimin e shumë agjencive federale pas mungesës së një marrëveshjeje për financimin e shpenzimeve të saj. Mbi 750 mijë punonjës federalë janë pezulluar përkohësisht nga puna, pasi agjencitë që konsiderohen “jo të domosdoshme” kanë ndërprerë veprimtarinë. Kjo situatë ndikon drejtpërdrejt edhe misionet diplomatike jashtë vendit, të cilat varen nga fondet e miratuara çdo vit nga Kongresi./klan
