Grupi shqiptar i investimeve Balfin ka regjistruar një fitim të konsoliduar neto prej 113 milionë euro në vitin 2024, duke shënuar një rritje prej 28% krahasuar me vitin e mëparshëm (89 milionë euro).
Sipas të dhënave të publikuara nga SeeNews, të ardhurat e konsoliduara të grupit arritën në 762 milionë euro, me një rritje prej 13% nga viti 2023. Fitimi EBITDA u rrit me 10%, duke kapur shifrën e 156 milionë eurove.
Balfin pagoi gjithsej 87.8 milionë euro tatime në vendet ku operon, një rritje prej 15.9% krahasuar me vitin 2023.
I themeluar në vitin 1993 në Vjenë nga Samir Mane, Balfin Group është sot një prej grupeve më të mëdha të investimeve shqiptare me aktivitet në Austri, Shqipëri, Kosovë, Bosnje-Hercegovinë, Maqedoni të Veriut, Mal të Zi, Kroaci, Holandë, Zvicër, Kanada dhe SHBA.
Grupimi është aktiv në fusha si real estate, tregti me shumicë e pakicë, bankë, turizëm, energji, edukim, argëtim dhe logjistikë.
