Në 76-vjetorin e krijimit të NATO-s, Ministri i Mbrojtjes Pirro Vengu ka përçuar një mesazh përkushtimi dhe krenarie për rrugëtimin e Shqipërisë brenda Aleancës më të fuqishme ushtarake të botës. Përmes një postimi në rrjetet sociale, ministri kujtoi se më 4 prill, Shqipëria shënon gjithashtu 16 vite si vend anëtar i NATO-s.
“Një rrugëtim përkushtimi dhe kontributi në sigurinë euroatlantike! Anëtarë të një familjeje të madhe që sot mbush 76 vjeç dhe krenarë për rreshtimin në krah të aleatëve tanë,” shkruan Vengu.
Ministri theksoi përparimet që Shqipëria ka bërë në fushën e mbrojtjes, duke përmendur investimet në modernizimin e forcave të armatosura dhe kapaciteteve luftarake. Ai vuri në dukje se Shqipëria sot ka ushtrinë më të mirëpaguar në rajon dhe se janë bërë hapa të rëndësishëm në zhvillimin e infrastrukturës dhe industrisë ushtarake.
“Sot, me kapacitete të reja luftarake dhe strategjike, me investime konkrete në infrastrukturë dhe në industrinë e mbrojtjes, Shqipëria është një partnere e besueshme në NATO. Krenar që sot Shqipëria vijon të jetë një faktor kyç në arkitekturën e sigurisë së NATO-s.” shtoi ai.
Në këtë përvjetor të rëndësishëm për Aleancën, mesazhi i ministrit Vengu nënvizon përkushtimin e vendit për të qëndruar krah për krah aleatëve dhe për të kontribuar në paqen dhe sigurinë globale.
