Në një takim me gratë dhe vajzat socialiste të Vlorës, Kryetari i Partisë Socialiste, Edi Rama, u ndal te lajmi që ka tronditur opinionin publik: pagesa prej 6 milionë eurosh për të lobuar në përpjekje për të hequr statusin “non grata” të një personi të njohur të politikës shqiptare.
“Është bërë një kontratë 6 milionë euro. Thuhet nga patriotë. 6 milionë euro për të hequr damkën e një personi non grata janë vërtet shumë për të mos bërë pyetjen: Ku u gjetën gjithë ato para?”, u shpreh Rama, duke theksuar se kjo shumë tejkalon shpenzimet që shteti shqiptar u jep të gjitha partive politike të marra së bashku.
Më tej, Rama ironizoi situatën duke kujtuar edhe rastin e mëparshëm të Lulzim Bashës me lobimin 500 mijë dollarësh: “Edhe herën e kaluar, Luli i shkretë për 500 mijë u bë leckë”, tha ai.
Në fjalimin e tij, Rama theksoi se zgjedhjet e 11 majit nuk janë thjesht një përballje politike, por një vendim historik mes rrugës së Shqipërisë drejt Bashkimit Europian dhe interesave personale të një “80 e kusur vjeçari” që, sipas tij, kërkon ta kthejë vendin pas në kohë. Ai u bëri thirrje vlonjatëve që të tregojnë ndjeshmëri historike në këtë moment të rëndësishëm dhe të mbështesin Partinë Socialiste në mënyrë që Shqipëria të sigurojë anëtarësimin në BE.
